Ақтауда студенттер арасында Универсиада Ойындары басталды

Ақтауда Yessenov University-де 24 мамыр мен 24 маусым күндері аралығында ҚР жоғары оқу орындарының студенттері арасындағы ХІІ жазғы Универсиада ойындары өтеді, деп хабарлайды mangystaumedia.kz.

Ғылым және жоғары білім министрлігінің қолдауымен өтетін универсиада бұрын спорт түрлері бойынша үш-төрт қалада өтетін болса, бұл жолғы универсиадасының ерекшелігі – барлық жарыстар бір аймақта ұйымдастырылмақ.

«Алдыңғы универсиада бағдарламаларында 30-дан аса спорт түрі болса, қазіргі таңда олар 17-ге дейін ықшамдалып, ең негізгі спорт түрлері ғана таңдап алынды. Бұл дегеніміз – саннан сапаға көшу. Яғни университеттердегі спортшылардың көп айналысатын спорт түрлерінің бейініне қарай, Ұлттық ғылыми-практикалық дене тәрбиесі орталығымен бірлесе отырып, Дүниежүзілік универсиаданың бағдарламасына басымдық бердік», - дедіYessenov University президенті Берік Ахметов.

Yessenov University Жазғы Универсиаданы алған күннен бастап, 2023 жылғы студенттер олимпиадасы Ақтау қаласында өтетіні белгілі болды. Өңірдің бар мүмкіндігін пайдаланып, Маңғыстау облысының 50 жылдығы, Ақтау қаласының 60 жылдығы аясында, Универсиаданы жоғары деңгейде өткізуге облыс және қала әкімдіктері де айрықша атсалыспақ ниетте.

Универсиада аясындағы жарыстар өтетін орындар мен уақыты:

Yessenov University бас корпусында 4-7 маусым күндері шахмат сайысы өтеді.

«Теннис орталығы» спорт кешенінде:
- үстел теннисі (25-29 мамыр).

«Маңғыстау-Арена» спорт кешенінде:
- грек-рим күресі (20-21 маусым);
- қазақша күрес пен дзюдо (21-23 маусым);
- еркін күрес (18-19 маусым);
- әйелдер күресі (18-19 маусым);
- жеңіл атлетика (2-4 маусым).

«Халық-Арена» спорт сарайында:
- ерлер мен әйелдер командалары арасындағы баскетбол (11-16 маусым);
- футзал (4-9 маусым);
- бокс (19-23 маусым).

«Батыр» спорт кешенінде:
- ерлер командалары арасындағы волейбол (17-23 маусым).

«Жас қанат» спорт кешенінде:
- бадминтон (11-17 маусым).

«Волна» спорт кешенінде:
- каратэ (11-14 маусым).

Yessenov Sport Club студенттік кешенінде:
- жүзу (26-29 мамыр);
- әйелдер командалары арасындағы волейбол (17-23 маусым);
- тоғыз құмалақ (5-8 маусым);
- таэквандо (18-20 маусым).

Универсиаданың ашылу салтанаты – 5 маусым күні болса, жабылу рәсімі 22 маусым күні «Маңғыстау-Арена» спорт кешенінде ұйымдастырылады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.