Ақтауда «Бөбек» балабақшасы ашылды

Кең жайылып, үлкейіп жатқан Ақтау қаласының 31 «б» шағынауданында өткен жылдың аяғында жаңа балабақша ашылып, бүлдіршіндердің сүйікті үйіне айналып үлгерген. Негізінен 31 «б» және «в» шағынаудандарында тұратын балаларды қамтып отырған бұл балабақшадағы балақайлар 4 топқа бөлінген. Жас шамасы—3-тен 6 жасқа дейін. Күніне 5 мезгіл тамақпен қамтылған балалар медицина қызметкерінің бақылауында.

«Бөбегім» балабақшасына жолымыз түсіп барған сәтімізде балабақшаға баласын бергісі келген жас ана тұр екен. Оған Мектепке дейінгі мекеме директоры Айнұр Түркменбаева орын жоқ екенін, мүмкіндік туып жатса, міндетті түрде шақыратын айтып, жылы сөзбен шығарып салды.

«Балабақшамыз 100 орындық. Орындарымыз толы. Мамандарымыз да жеткілікті. «Балапан» бағдарламасы аясында ашылғандықтан мемлекеттен бөлінген қаржыға барлық керек дүниелерімізді алдық. Бізге несиені Ауыл Шаруашылығын қаржылай қолдау қоры Маңғыстау филилы берген болатын», - деді Айнұр Түркменбаева.

Жеке кәсіпкер Айнұр Түркменбаева несие алған бұл филиал — «КазАгро» Ұлттық басқарушы холдингінің еншілес ұйымы. Мұның негізгі қызметі ауыл шаруашылық тауар өндірушілерін және ауылдағы шағын бизнесті дамытуға қаржылай қолдау көрсету.

«Біз қаржылай қолдау көрсеткенде несиені жеңіл пайызбен ұсынамыз», - дейді филиалдың несие бөлімінің басшысы Шолпан Дүйсенбаева.

Қазіргі таңда мемлекетте «Нәтижелі жұмыспен қамту және кәсіпкерлікті дамыту» бағдарламасы бойынша қатысушыларға 6% берілетін несие қарастырылған. Осы ереже бойынша несие алам деген азаматтар мал шаруашылығына 4,0 миллион теңге, егін шаруашылығына 6,0 миллион тенге, басқа да салаларға 6,0 миллион теңге несие ала алады. Бұл бағдарламаға жұмыста жоқ ауыл тұрғындары, ауыл кәсіпкерлері және қала тұрғындары қатыса алады.

Бұрын да кәсіпкерлікпен айналысып жүрген Айнұр Жетібайқызы филиалдан 10 млн теңге несие алған. Сыйақы мөлшері – 6%. Ал ата-аналар балабақшаға ай сайын 15 000 төлейді. Бұл, әлбетте, жұмыста жүрген ата-аналардың мүмкіндігі жетпейтін көрсеткіш болмаса керек. Ең бастысы – мұндағы балалардың қарны тоқ, ұйқысы қанық, көңіл-күйлері жақсы және күні бойы сенімді бақылауда. Ата-анаға бұдан артық ештеңе де қажет емес.

Валентина ҚОЗЫБАҚОВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.