Ақтауда мүмкіндігі шектеулі балаларға арналған медиа-мектеп ашылады

Қалада алғаш рет мүмкіндігі шектеулі балаларға арналған медиа-мектеп ашу жоспарланып отыр. Бұл туралы облыстық қоғамдық коммуникация орталығында өткен брифингте «Батыр бол» әлеуметтік жобасының Маңғыстау облысы бойынша жетекшісі Кенжегүл Тайғара мәлімдеді, - деп хабарлайды mangystaumedia.kz сайты.

«Жобаға Петропавл, Атырау, Ақтау қалаларынан келген жастар қатысты. Ұйымдастырушылар әр облыстан келген балаларды топ-топқа бөліп, достық қарым-қатынаста жұмыс жасауға үйретті. Қатысушылар мүмкіндігі шектеулі екендеріне қарамастан, тың идеяларымен, видео-блог түсіруде таңдалған тақырыптары ерекше тәнті етті. Қуана айта кететін жәйт, республика бойынша алғаш рет Ақтауда мүмкіндігі шектеулі балаларды дамытып, ары қарай жігерлендіру мақсатында медиа-мектеп ашылу жоспарлануда», - деді Кенжегүл Тайғара.

Айта кетейік, былтыр Ұлттық Дельфий Комитетінің ұйымдастыруымен «Батыр бол» әлеуметтік жобасының іріктеуі өткен. Өңірден 51 бала қатысып, оның 8-і республикаға жолдама алған болатын.

Жоба аясында республикалық кезеңге жолдама алған жастар 10 күн бойы әлеуметтік жарнаманы жасау мен оны ғаламтор желісінде таратудың қыр-сырын үйренді.

Жұлдызай ҚАЛИЕВА

Суретті МО қоғамдық коммуникация орталығы ұсынды

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.