Қазақстанда 1273 адам гемофилиямен тіркеуде тұр

Жыл сайын 17 сәуір күні көпшілік ел Дүниежүзілік гемофилиямен күрес күнін атап өтеді. Осы мақсатта Дүниежүзілік Гемофилия Федерациясы мен ДДҰ акцияларына қосылады. Гемофилия – қанның ұюына әсер ететін VIII және IX факторлардың жетіспеушілігінен туындайтын және тұқым қуалайтын ауру. Науқастың қаны өте сұйық болғандықтан, адам денесін соғып, ұрып алса, тіс жұлдырғанда қан тоқтамайды. Әлемде 400 мыңға жуық гемофилияға шалдыққан науқас бар. Ал Қазақстанда 1273 адам тіркеуде тұр, олардың 34 пайызы – балалар. Гемофилияны емдеудегі басты мақсат – сұйық қанның ағуын тоқтату. Ол үшін құрамында қанның қоюлануына әсер ететін препарат пайдаланылады. Дәрі донорлық плазмадан, генно-инженерлік әдіспен алынады.Қазақстан мұндай препаратты 2010 жылдан пайдалана бастады. Дәрі науқастарға мемлекет есебінен тегін беріледі. Айта кетейік, елімізде тегін дәрі-дәрмектің шын мәнінде мұқтаж науқастарға жетіп отырғандығы SMS-хабарлама арқылы қадағаланатын болады. «Міндетті әлеуметтік медициналық сақтандыру қоры» Маңғыстау филиалының хабарлауынша, 2019 жылдың алғашқы тоқсанында дәрі-дәрмекпен қамтамасыз етілмеген 12 жағдай кездескен. - «Пациенттерге маусым айының соңына дейін SMS-хабарлама жолданатынын ескерткіміз келеді. Хабарлама жүйеге 2019 жылы 1 қаңтардан 30 маусымға дейін тегін-дәрі дәрмек алғандар ретінде енген тұрғындарға жіберіледі. Ақпараттық жүйеде көрсетілген 5,7 млн телефон нөміріне хабарлама жіберу жоспарланып отыр. Хабарламада рецептінің нөмірі мен дәрінің берілген күні көрсетіледі. Препараттар шын мәнінде қолына тимеген пациенттер SMS-хабарламаға жауап ретінде «0» цифрын жолдай алады немесе «СҚ-Фармация» ЖШС-нің 1439 байланыс нөміріне қоңырау шалса болады. Ескерту: қоңырау шалу да, SMS-те – тегін», - дейді «МӘМС» жергілікті филиалының бөлім басшысы Айгүл ДӘДЕН. Биыл Қазақстан бюджетінен гемофилиямен ауыратындарға 7,1 млрд теңге бөлінген.