Мәжілісмендер жаңаөзендік ардагерлермен кездесті

ҚР Парламенті Мәжілісінің депутаттары Абай Тасболатов пен ҚР Ардагерлер ұйымы республикалық қоғамдық бірлестігі орталық кеңесінің төрағасы Бақтықожа Ізмұханбетов Жаңаөзен қаласы әкімдігінің мәжілістер залында ардагерлермен кездесті. Кездесуге Жаңаөзен қаласы ардагерлерінен тысқары Ақтау қаласы мен Қарақия аудандық ардагерлер қоғамдық кеңесінің төрағалары қатысты. Сондай-ақ кездесуде ҚР Ардагерлер ұйымы республикалық қоғамдық бірлестігінің орталық кеңесі төрағасының орынбасары Өмірзақ Озғанбаев пен қоғам қайраткері Зейнолла Алшымбаев та болды. Кездесуді Маңғыстау облысының әкімі Ералы Тоғжанов жүргізіп отырды.

Бақтықожа Салахитдинұлы биылғы 5 қазанда жарияланған Елбасы Н.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауынан келіп туындайтын мәселелер жөнінде әңгімеледі. Әсіресе, Жолдауда айтылған 6 бағытты жеке-жеке талдап, халықтың әл-ауқатын одан әрі жақсарту үшін 1,5 триллион теңге қаржы бөлінетінін түсіндірді.

Сондай-ақ өзінің өмірбаяны мен өмірлік тәжірибелерін тілге тиек етіп, бүгінгі саясат сахнасындағы саңлақтар туралы да сыр шертті. Туризм мәселесі туралы айтқанда өзінің Словения мемлекетіне барғандағы көрген-білгендерін, көңілге түйгендерін Қазақстанмен, соның ішінде Маңғыстаумен салыстыра отырып мысалдады. Дін және діни ағымдарды да әңгіме өзегіне айналдырды. Елбасымен сапарлас болған сәттердегі Президенттің қасиеттері мен тапқырлығын да тамылжытып айтты.

Өз кезегімен мінберге көтерілген Абай Тасболатов Қазақстанның қорғаныс әлеуеті туралы әңгімеледі. Ол кісі кезінде ҚР Қорғаныс министрінің орынбасары болып қызмет еткен екен. Сондықтан Каспий маңы мемлекеттерінің қорғанысының маңыздылығы туралы және Парламент Мәжілісіндегі халықаралық істер, қорғаныс және қауіпсіздік комитеті жөнінде ақпарат берді. Қорғаныс, қауіпсіздік істері жөніндегі заңдардың маңыздылығы туралы түсіндірді. Бұл бойынша елімізде жүргізіліп жатқан тәжірибелерге тоқталды.

Кездесу соңында ардагерлер атынан шығып сөйлеген Жаңаөзен қалалық ардагерлер кеңесі қоғамдық ұйымының төрағасы Қуандық Бекмағанбетов қаладағы ардагерлердің тыныс-тіршілігі туралы айта келіп, ҚР Парламенті Мәжілісінің депутаттары Бақтықожа Ізмұханбетов пен Абай Тасболатовқа алғыс айтып, ризашылығын білдіріп, халық игілігі жолындағы қызметтеріне табыстар тіледі.

Мұратбай ҰЛЫҚПАН, Суретті түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.