Жағалаудағы құрылыс жұмыстары қалай жүруде?

Маңғыстау облысы аумағы мен Каспий жағасында туризм саласы бойынша үлкен құрылыс нысандары тоқтаусыз жүргізіліп келеді. Жалпы ұзындығы 1450 метрді қамтитын аралықта тынымсыз жұмыс жасалып жатыр. Соның бірі "Жар асты жолы" жобасы – жағалау бойлап, халық серуендеп, шаммен безендірілген, тарихымызды дәріптейтін бейнелер қашалған тастармен көмкерілген демалыс жайы. Жұмыс барысына назар аударып, қарқынын байқап көру мақсатында жұмысшылармен жүздесіп, көңілін тауып тілдесіп қайтқан едік.

- Бұл саяхатшыларға арнал­ған жолақтың құрылысы жоспар бойынша уақыты­лы орындалып, біраз аумақты мерзімі­нен асырып та жасадық. Ауа-­райының ыстығына қарамай, белімізді бекем байлап, 10 техника мен 120 жұмысшы шаруа атқарып жатырмыз. Құрылысқа қажетті заттардың барлығы, тіпті боя­уына дейін Қазақстанда жасалған. Жолға төселетін тастардың 1500 шар­шы метрін төсеп тастадық. Таңертең ертемен іске кірісіп, түскі уақытта сәл үзіліс жасап, кеш түскенше жан сала­мыз, – деп Ермұхан Сәбиев сөзін тәмамдады.

Жұмысшылардың жағдайын бақы­лап қайтқан соң «Нұрсат» ЖШС құ­рылыс компаниясының басшысы Мақсат Мурсимұлы:

– Маусым айында бастаған құрылыс нысанының жалпы ұзындығы бір жа­рым шақырымға жуық, тамыз айында өтетін халықаралық саммитке дейін 30 пайызын, яғни 500 метр аумағын аяқтағалы отырмыз. Қалған бөлігін толықтай 2020 жылға дейін жоспар­лап, тапсырамыз деген ниеттеміз. Кез келген тұрғыдан қарасақ та, бұл кешен халыққа өте тиімді, теңіз жағасында се­руендеп, демалып қайтуға әсем мекен болады. Туризм саласын одан әрі да­мыта түсуге ықпалы зор. Халықаралық саммит кезінде бес мемлекеттің пре­зиденті бас қосып, демалыс орнына келеді деп күтілуде. 4­-шағынаудан мен 15-­шағынаудан арасы осылайша көр­кеймек, – деп дерек берді.

ТАҒЫ ОҚЫҢЫЗ: Құтқарушылар ескертеді: теңіз жағалауында рейд жүрді (ФОТО, ВИДЕО)

Марат Сюников сызбасын жаса­ған демалыс орнында бүгінгі күнді тарихпен байланыстыра­тын қашалған тастар жетерлік. Ежелгі балбал тастардың мүсінін қалап, жардағы көне кейіптер бабалардың асқақ рухын сомдағандай.

15­-ші шағынаудан тұсындағы жағалау жа­нынан кең көлемдегі концерттік бағдарламалар мен түрлі мерекелік шаралар кезінде көрермендерге ыңғайлы етіп амфитеатр салынуда. 300­-ден аса жұмысшы жұмыл­дырылған кешен құрылысы қызу жүргізілу үстінде.

– Жұмыс бағыты өте қарқынды жүріп жа­тыр. Мұнда Ақтау қаласының халқы мен демалуға кел­ген қонақтарға тынығу үшін барлық жағ­дай жасалады. Салынып жатқан сахнаның ұзындығы 70 метрді құрайды, жұртшылық­қа көру үшін ыңғайлы етіп көше биіктігі­нен 4 метр төмен орналастырдық, 4 тұстан көлеңкелейтін шатырлар дайындалуда, теңіз толқыны шамадан тыс асып кеткен жағдайда кешенді қорғап қалатын арматур жалғау арқылы құйылған арнайы бетон бар. 48 мың шаршы метрге тас төселуі тиіс, оның 25 мыңын аяқтап үлгердік. Жалпы нысанды қыркүйек айында бітіреміз, – деп, құрылыс аумағының басшысы Қаныбек Байжанов жұмыс жайынан хабардар етті.

Бір сөзбен айтқанда жағалау бойы дала мұражайынан кем түспес, ел­-жұрттың көз­айымы болып, туризм бағытын ілгерілетіп, келешекте қала халқының мақтанышына айналары сөзсіз. Тарих пен осы күнді са­бақтастыра алатын, танымды кеңейтер ны­санның жұрт игілігіне жарарына сенім мол.

Мадияр ТӨЛЕУОВ Суреттерді түсірген Талант ҚҰСАЙЫН

[gallery td_select_gallery_slide="slide" ids="58161,58162,58167,58166,58164,58165,58163"]