Фейсбук әлеуметтік желісінде ыдыстарды жерге лақтырып жатқаны түсірілген видеосы тарап, уақытша жұмыста шеттетілген Маңғыстаудағы мүгедек балаларға арналған интернат директоры жұмысына қайта оралды. Бұл туралы Маңғыстау облысының жұмыспен қамтуды үйлестіру және әлеуметтік бағдарламалар басқармасы басшысының орынбасары Мәншүк Тілеуқұлова мәлімдеді деп хабарлады Лада сайты.
Естеріңізге сала кетейік, оқиға 2018 жылғы 7 маусым күні № 3 арнаулы әлеуметтік қызметтер көрсету орталығында болған. Осы бейнежазбадан соң психоневрологиялық аурулары бар мүгедек балаларға арналған интернат-үйінің директоры Шаттыгүл Қаракүшікова жұмысынан уақытша шеттетіліп, мәселенің мән-жайын анықтау үшін комиссия құрылған еді.
Комиссия құрамына Маңғыстау облысы әкімінің кеңесшісі, облыстық еңбек, әлеуметтік қорғау және көші-қон департаментінің, жұмыспен қамтуды үйлестіру және әлеуметтік бағдарламалар департаментінің, медициналық, әлеуметтік мекемелердің өкілдері кірген. Комиссия ғимаратта орнатылған камералардың бейнежазбаларын қарап, қызметкерлермен тілдескен. Комиссия мүшелері директор Ш.Қаракүшікова мен бала күтуші Э.Аманованың арасында арасында бұған дейін де келіспеушіліктің болғанын анықтаған.
Айта кетейік, сол кезде Маңғыстау облысының жұмыспен қамтуды үйлестіру және әлеуметтік бағдарламалар басқармасы басшысының орынбасары Қ.Нұрмамедова «мекеме директоры лақтырған ыдыстар мен азық-түлік орталықтың қызметкерлеріне тиесілі, балалар тамақ ішетін жерде нұсқаулық бойынша қызметкерлердің заттары болмауы тиіс, бұл туралы бұған дейін ескертілген» деген болатын.
Алайда сол күні интернатты тексеруге келген директор қызметкерлердің тағы да балалар тамақ ішетін жерде тамақтанып, ыдыс-аяқтарын сақтағанын көріп, заттарды лақтырған.
Директор мен қызметкерлер арасындағы дау-жанжалдың шығу себебін анықтап, мәселеге қаныққан комиссия Ш.Қаракүшіковаға қатаң сөгіс беру туралы шешімге келген. Осылайша, ол 10 шілдеден бастап жұмысына қайта кірісті. Алты ай ішінде мұндай әрекет қайталаған жағдайда, ол жұмысынан босатылады.
Камшат ОҢҒАЛТАЙ,
Скриншот видеодан түсіріп алынды
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
