«АМАNАТ» партиясының республикалық штабының алғашқы отырысы өтті

Ерлан Қошановтың төрағалығымен "Amanat" партиясының республикалық штабының алғашқы отырысы өтті, деп хабарлайды mangystaumedia.kz

Мемлекет басшысы «Республикалық референдум туралы» Қазақстан Республикасының Конституциялық заңына өзгерістер мен толықтыру енгізу туралы» Қазақстан Республикасының Конституциялық заңына қол қойды. Осыған орай партияның республикалық штабының алғашқы отырысы өтті.

Бейнеконференция арқылы өткен отырыста партия төрағасы Ерлан Қошанов жалпыұлттық референдум өткізу бастамасын қолдайтынын айтып, мәлімдеме жасады.

Республика көлемінде ақпараттық-түсіндіру жұмыстары мен іс-шараларды жан-жақты ұйымдастыру үшін партия жанынан республикалық және 17 өңірлік штаб құрылды. Штаб құрамына «AMANAT» партиясының активтері кірді.

Республикалық штабтың ашылуынан кейін, Маңғыстау облысының штаб төрағасы, облыстық филиалдың атқарушы хатшысы Е.Әбілов штабтың алдағы жұмыс жоспарын таныстырды.

— Маңғыстау облысында партия филиалдары жанынан 8 штаб құрылды. Облыста және аудандар мен қалаларда үгіт-насихат жұмыстарын жүргізу үшін желілік кесте жасақталды. Кестедегі шараларға барлық штаб мүшелері белсенді атсалысып, жұмыла әрекет етуіміз керек, - деді Е.Әбілов.

Маңғыстау облыстық мәслихат хатшысы Н.Тумышев пен өңірлік филиалдың атқарушы хатшысының орынбасары З.Есбергенова да штаб жұмысына сәттілік тілеп, штаб мүшелерін бірлесе жұмыс жасауға шақырды.

Партия Төрағасы Е.Қошанов: «Президент Қазақстан халқына жариялаған биылғы Жолдауында ауқымды саяси реформалар ұсынды. Бұл реформалардың мақсаты – халықтың әл-ауқатын арттыру, суперпрезиденттік басқару формасынан Парламент пен мәслихаттардың рөлі күшейген саяси жүйеге көшу, демократиялық процестер қарқынын үдету, елдегі бірлік пен ынтымақты арттыру», - деп мәлімдеді.

Сонымен қатар ауқымды реформалар — сайлау жүйесін, партиялық және сот-құқықтық жүйесін, аумақтық-территориялық құрылым мен мемлекеттік биліктің бөліну жүйесін түбегейлі өзгертетінін атап өтті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.