Ақтауда әскерилер шағын футболдан турнирге қатысты

Ақтау гарнизонындағы Қарулы Күштер құрылымдарының әскери қызметшілер арасында шағын футболдан турнир өтті, - деп хабарлайды mangystaumedia.kz сайты Ақтау гарнизоны баспасөз қызметіне сілтеме жасап.

Жарыстың басты мақсаты – әскери қызметшілер арасында салауатты өмір салтын дәріптеу, қызметкерлердің дене шынықтыру дайындығын жоғары деңгейде ұстауын қамтамасыз етіп, спорттық даярлығын дамыту.

Спорттық додаға 6 команда, 80 әскери қызметші қатысты. Атап айтқанда, әскери теңіз базасы, әртекті кемелер дивизионы, теңіз жаяу әскери бригадасы, әуеге қарсы қорғаныс күштері, материалдық-техникалық қамтамасыз ету базасы, әскери полиция және авиация базасының әскери қызметшілерінен құралған командалар бақ сынасты.

«Дәстүрге айналған әскери қызметшілер арасындағы шағын футболдан жарыс тартысты өтті. Барлық команда өздерінің шеберліктерін көрсетті», – деді авиация базасының командирі полковник Медет Әскетаев.

Жарыс қорытындысы бойынша 1-орынды материалдық-техникалық қамтамасыз ету базасы алды. 2-орынды авиация базасы, 3-орынды – теңіз жаяу әскери бригадасы иеленді. Жеңімпаз командалар мен жүлдегерлер жарыс кубогымен, дипломдармен марапатталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.