Биыл көптен күткен лагерь маңғыстаулық бүлдіршіндер үшін қайта оралды. 18 маусым күні «Балдәурен» жазғы демалыс лагері алғашқы ауысым балаларын қабылдайды. Бұл туралы жазғы лагерь ұйымдастырушысы, «Дарын» қосымша білім орталығының директоры Несібелі Қуатова айтып берді.
- Биылғы лагерьдің бұрынғыдан ерекшелігі қандай, әңгімені содан бастасақ...
- Ең басты ерекшелігі лагерь алдымен әлеуметтік аз қамтылған отбасы балалары, сондай-ақ отбасылық үлгідегі балалар ауылының тәрбиеленушілері үшін қызмет етеді. Бұл балалардың қазіргі уақытта өз бетінше демалуға, жазғы уақытын тиімді әрі қызықты өткізуге мүмкіндіктері жоқ. Былтыр лагерь ұйымдастырмақ түгілі, жай далаға шығып ойнаудың өзі қиын заман болды. Бұл кезең де артта қалды, бірақ қазір балалардың көп оқшауланып қалғаны білінеді. Сол себепті, лагерь бағдарламасын барынша қызықты әрі кешенді өткізуге басты назар аударып отырмыз.
- Сонда бағдарламаға қандай қызықты дүниелер кіреді?
- Өзіңіз білесіз, жас буын карантин уақытында рухани шөліркеп қалды, балалар баратын көпшілік мәдени орындардың жұмысы шектелді. Осыны ескере отырып, арнайы қуыршақ театры және драма театрымен келісім орнатып отырмыз. Яғни, балалар табиғат аясында қойылымдар көріп, кітап оқып, сурет салып, ән айтып, би билеп жарысады. Балалар лагерь уақытында теңіз жағалауында, таза ауада демалып, интелектуалдық ойын ұштай түседі деген сенім бар.
- Лагерь қанша балаға арналған?
- Негізінен «Балдәурен» базасы бір мезгілде 140-160 баланы қамти алады. Алайда, бас мемлекеттік санитариялық дәрігерінің қаулысын басшылыққа алып отырып, талапқа сәйкес, бір ауысымда 100 баланы қабылдап отырмыз. Лагерь уақытында сыртпен байланыс орнатылмайды, балалар 10 күн бойы базадан шықпай-ақ, түрлі шараларға қатысады. 3 ауысым бойы облыстағы жеңілдік санаттағы балаларды қамтимыз, содан кейін лагерь балаларды ерікті түрде ақылы қабылдауды жалғастырады. Балалардың жасы 7-14 жас аралығында. Лагерь – мемлекеттің меншігіндегі теңіз жағалауында орналасқан балаларға қуаныш сыйлайтын бірден-бір кешен.
- «Балдәурен» демалыс базасы туралы айта кеттіңіз. Мұнда жазда лагерьден бөлек, басқа маусымда қандай шаралар ұйымдастырылады?
- Бұл демалыс базасы білім басқармасына қарасты «Дарын» қосымша білім орталығы саналады. Мұнда 9 ай бойы облыста жан-жақтан іріктелген дарынды балалар арнайы дайындықтан өтеді. Дарынды балаларға оқу ауысымдары тұрақты түрде ұйымдастырылып отырады. Бұған дейін базаға барар жол қиындау болды, қазір бұл қиындықтар еңсерілді. Базада спорт комплексі, 2 заманауи жатақхана, мектеп ошағы, мәдени кешен, ойын алаңы, сондай-ақ асхана бөлек орналасқан. Бұл жерде айтпағым, дарынды балалар үшін барлық жағдай қарастырылған.
- Сонымен, сіз акцент бұрып отырған дарынды бала деген кім?
- Кез келген бала дарынды. Тек сол баланың қабілетін дер кезінде тани білу қажет. Қазіргі уақытта бала жан-жақты дамымаса, көштің соңында қалып қояды. Заман талабы сондай. Ата-ана мен ұстаз баланың қай пәнге икемі бар, қай жаққа аңсары ауып тұрады, соны байқау керек. Сол қабілетті ескеріп, баланы олимпиадаға, ғылыми жұмысқа, шығармашылық сайысқа қатыстыра берген жөн. Қазір бала түрлі шараларға қатысса, негізгі сабағына кедергі болады деген жаңсақ пікір бар. Керісінше, бала түрлі жарысқа қатысқан сайын ортасы кеңейеді, интеллектуалды ойы артады. Ал осының нәтижесінде балалар жоғары оқу орнына түсу үшін білім гранттарын жеңіп алуға үлкен мүмкіндік бар. Сондай-ақ, біздің орталық талантты оқушыларды ынталандыру мақсатында жыл он екі ай бойы республикалық сауықтыру орталықтарына жолдамалар беруді ұйымдастырады.
Сұхбаттасқан Айгүл ДӘДЕН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
