Белсенділер Жетібайдағы провизорлық стационарды аралады

Кеше Жетібай ауылдық мешітінің бас имамы Есбол Қалбаев, әлеуметтік желі белсендісі Ағзам Жұмсақов, аудандық мәслихат депутаты Гүлшат Мұқанова бастаған бірнеше ауыл тұрғыны Жетібайдағы провизорлық стационарға барып, онда емделіп жатқан науқастардың хал-жағдайын біліп қайтты.

Бүгінде КВИ стационарында 40-тан астам науқас ем қабылдап жатыр. Оның 7-і ауыр жағдайда. Тіпті, жас жұбайлар, ата-анасымен бірге жанұясымен ауырып, ем алып жатқандары да бар. Амбулаторлық жағдайда ем қабылдап жатқан науқастар да аз емес. Бұл әрине, аядай ауыл үшін алаңдатарлық көрсеткіш.

- Өкінішке қарай осы науқастардың бірде біреуі вакцина алмаған. Вакцина алу деген "100 % ауырмайды" деген сөз емес, осыған дейін ауырған 1-2 пациент болды. Бірақ еш асқынусыз, жеңіл түрімен ауырып, өте тез сауығып кетті. Алайда, ауыл тұрғындары арасында осыны түсінгісі келмейтіндер де бар. Біз пациенттің көзқарасына, вакцина алған/алмағанына қарамастан емдеп жазуға, қолдан келгенше көмектесіп, ажалдан арашалап қалуға тиіспіз, - дейді реаниматолог дәрігер Нұрлан Тасмұханов.

Байқағанымыз, емделушілер дәрігер, медбикелердің қызметіне дән риза.

- Орталықта 2-3 апталап ұзақ жатқан науқастар да бар. Олар көбінде үйде емделем деп, ауруын асқындырып алғандар. Сондықтан ауру белгісі біліне салысымен дәрігерге қаралып, асқынудың алдын алыңыздар, - дейді реаниматолог.

Бас имам ауырып жатқандарға шипа тілесе, депутат науқастардың арыз-тілегін тыңдады. Ал, желі белсенділері эпидемиологиялық ахуалдың қаншалықты күрделі екендігіне көздерін жеткізді.

Шынар Кендін

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.