Ақтаулық оқушы Токио Халықаралық университетіне шақырту алды

Ақтау қаласындағы Назарбаев Зияткерлік мектебінің 12-сынып оқушысы Ақбота Алпамысова Жапониядағы Токия Халықаралық университетінде (Tokyo International University) тегін оқуға шақырту хатын алды, - деп хабарлайды mangystaumedia.kz сайты.

Болашақ түлек Digital Business and Innovation факультетінде білімін жетілдіре алады. Былтыр университетке құжат тапсырған Ақбота Алпамысова халықаралық ағылшын тілі емтиханы IELTS-тан 7.5 балл жинап, мотивациялық эссе жазған.

"Мамандық таңдау мен үшін өте маңызды іс. Бұған зияткерлік мектептерде жауапкершілікпен қарайтындығы қуантады. Ұстаздарым мен мектебіміздің кәсіби бағдар беру кеңесшісінің көмегінің арқасында әлемдік деңгейдегі топ университетке шақырту алғаныма қуаныштымын. Еліміздегі білімді жастардың дамуына үлес қосып жүрген зияткерлік мектептер жүйесіне шексіз алғысымды білдіремін", -дейді Ақбота Алпамысова.

Зияткер шешім қабылдауға әлі ерте екендігін айтады. Себебі басқа да оқу орындарына құжаттарын тапсырып, жауабын күтіп жүр.

"Болашағымды жасанды интеллект саласымен байланыстырғым келеді. Осы салада жаңалық ашып, оның дамуына елімде үлес қоссам деймін", - дейді Ақбота.

Айта кетейік, Ақбота Алпамысова - Ақтау қаласындағы зияткерлік мектеп тарихында Жапониядан толық білім грантын алған тұңғыш оқушы. 2018 жылы Times Higher Education Токио Халықаралық университетін үздік он халықаралық университеттердің қатарына енгізген.

Ақбота Алпамысова - зияткерлік мектепте 7-сыныптан бері білім алып келеді, белсенді оқушылардың бірі. Оқу орнындағы Біріккен Ұлттар ұйымы моделінің белсенді мүшесі және 2020 жылы Франциядағы Лион қаласында өткен Біріккен Ұлттар Ұйымы моделі конференциясының қатысушысы.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.