Бүгін Маңғыстау облысының әкімі С. Трұмов облыстық ардагерлер кеңесі ұйымының жетекшісі С. Төлетов пен өңірдің ақпараттық және мәдени саласының дамуына үлесін қосып, бүгінде құрметті демалысқа шыққан М. Ғұмарованы қабылдады, деп хабарлайды mangystaumedia.kz.
Серікбай Төлетов бүгін мерейлі 70 жасқа толды. Ол саналы ғұмырын мұнай өндіру саласына арнап, ұзақ жылдар өнегелі де жемісті еңбек етті. Бүгінгі таңда қоғамдық жұмыстардан қол үзбей, облыстық Ардагерлер кеңесі ұйымының жетекші қызметін абыроймен атқарып келеді.
Ал, Майра Ғұмарова кәсіби журналист. Өңірдің ақпарат және мәдени саласында еңбек етіп, бүкіл қажыр-қайратын ұлттық құндылықтарымыз бен мол мәдени мұрамызды дәріптеуге арнады. Облыс әкімінің баспасөз қызметіне, мәдениет және тілдерді дамыту басқармасына жетекшілік етті.
Облыс әкімі қос азаматты мерейлі жасымен құттықтап, еселі еңбектеріне алғысын білдірді.
«Еңбегіне қарай өнбегі» демекші, ерен еңбектеріңіздің арқасында талай асуларды еңсеріп, белестен белеске көтерілдіңіздер. Өмірлік ұстаным, іскерлік және адамгершілік өнегелеріңіз жастар үшін үлгі болды. Алдағы уақытта да әрбір істеріңіз сәтті болсын, биік табыстарға жете беріңіздер. Дендеріңізге саулық, шаңырақтарыңызға ырыс-береке тілеймін»,- деді облыс әкімі С.Трұмов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
