Маңғыстауда қайта өңдеу полигонын ашу жоспарда бар – Дүйсен Құсбеков

Маңғыстау облысында құрылыс қалдықтарын жинау мен қайта өңдеу полигонын ашу жоспарда бар. Бұл туралы Қоғамдық коммуникация орталығында өткен брифингте Маңғыстау облысы табиғи ресурстар және табиғат пайдалануды реттеу басқармасының басшысы Дүйсен Құсбеков мәлімдеді, - деп хабарлайды mangystaumedia.kz сайты.

Оның айтуынша, өңірде санитарлық талаптарға сәйкес келетін 7 полигон бар. Бұл полигондар Жаңаөзен, Форт-Шевченко қалаларында және Мұнайлы ауданының Баянды ауылында, Қарақия ауданының Жетібай, Құрық ауылдарында, Бейнеу ауданының Бейнеу ауылында, Маңғыстау ауданының Шетпе ауылында орналасқан. Арнайы талапқа сай емес 16 қоқыс тастайтын алаң бар. Ал бұл орындар Маңғыстау ауданындағы 7 ауылда және Бейнеу ауданындағы 9 ауылда орналасқан.

«Жалпы полигондар жағдайы мен қоқысты сұрыптау жұмыстары мәз емес. Аймақта тұрмыстық қатты қалдықтарды сұрыптаумен, қайта өңдеумен айналысқысы келетін инвесторлар бүгінгі ахуалға байланысты кідіріп тұр», - дейді Дүйсен Құсбеков.

Спикердің мәліметінше, қазір өңірде құрылыс жұмыстары артып жатыр. Сәйкесінше құрылыс қалдықтары да көп.

«Құрылыс қалдықтарын жинау мен қайта өңдеу алаңының құрылысы Нұрсұлтан қаласында жүргізілуде. Осыған орай, Маңғыстауға да Мұнайлы ауданындағы полигон маңынан құрылыс қалдықтарын жинау мен қайта өңдеу алаңын ашуды ұйымдастырсақ дейміз. Маңғыстау облысында қалдықтарды жинау және шығарумен 21 мекеме айналысады. Өңір бойынша 12 006 дана қоқыс сақтайтын контейнер бар. Әлі де 16 819 данасы қажет», - дейді Дүйсен Құсбеков.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.