Маңғыстау облысында газ бағасы тағы да көтеріліп жатыр, - деп хабарлайды mangystaumedia.kz.
Бензин қымбат болғандықтан, сұйытылған газға көшкен қарапайым халық бағаның күн санап шарықтап жатқанына наразы. Кей жүргізушілердің айтуынша өңірде қазір газ бағасы әртүрлі: ең арзаны 62, қымбаты 70 теңгеге дейін барады.
50-55 теңге болса да халық көніп еді. Мынау енді 70 теңге деген не сұмдық? Қымбат қой. Біздің қалтамыз көтермейді, - дейді көлік жүргізушісі.
«ҚазМұнайГаздан» 50 теңгеге алатын едік, оның өзінде газдың көлемі шектеулі болатын. Қазір жекеменшік бекеттерде газ бағасы 65 теңге дейін жетті. Күннен күнге өсіп жатыр. Жуырда тағы да өседі дейді. Шешімі табылса дейміз, - дейді жүргізуші Арман Азанов.
Облыстық энергетика басқармасыың бас маманы Бауыржан Ерпан 1 наурыздан бастап Энергетика министрлігі мен Ұлттық экономика министрлігінің шекті баға 50 теңге болуы тиіс деген бұйрығы күшін жоятынын айтты. Ал 1 наурызға жетпей бағаны өсірген кәсіпкерлерге түсіндіру жүргізілгенін айтты. Сондай-ақ, сәуір айынан бастап электронды сауда алаңы арқылы сатылатын газдың көлемі ұлғаяды. Жылдың соңына дейін түгел газ көлемі электронды сауда алаңында сатылмақ. Ол кезде сұйытылған газ бағасы 80, тіпті 90 теңгеге дейін көтерілуі мүмкін екенін айтты.
«Қазақ Газ Өңдеу» зауытынан бөлек Маңғыстау облысына «Атырау Мұнай Өңдеу» зауытынан сұйытылған газ тасымалданады. Оның бағасы бір тонна үшін 93 мың теңгеге шығады. Сол себепті кәсіпкерлер бағасын қымбаттау сатып отыр, - дейді МО энергетика басқармасының бас маманы Бауыржан Ерпан.
Махаббат НҰРЖАНҚЫЗЫ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
