Ақтаулық оқушы жылыжай өсімдіктерін суаратын машина құрастырып жатыр

Ақтаудағы Назарбаев зияткерлік мектебінің 10 «А» сынып оқушысы Диана Қуанбай жылыжай мен көгал суаруға арналған машина жасап шығарды. Бұл туралы mangystaumedia.kz сайты Ақтау қаласы әкімдігінің баспасөз қызметіне сілтеме жасап хабарлайды.

Диана Қуанбай осы жобамен 2019 жылы айналысып бастаған. Әзірге робот мекет күйінде дайын тұр.

«Жұмыс жасау процесі оңайлатылған. Робот алдымен топырақтың ылғалдылығын өлшеп, осыған сәйкес су мөлшерін анықтап, жерді суарады. Әзірге білім ордамыздағы жылыжайда сынап жүрміз және роботты жетілдіру үстіндеміз. Осы жобамен облыстық ғылыми байқаулар жобасында жүлделі орыннан көріндік, енді Республикада қорғаймын», - дейді өнертапқыш.

Диана қазіргі кезде бірегей жобасымен наурыз айында өтетін республикалық байқауға дайындалуда. Роботқа қауіпсіздіктен қорғайтын корпус, GPS датчик (робот анықтаған ақпарат ұялы телефоннан көрінеді) орнату жоспарлап отыр.

16 жастағы Диана Қуанбай болашақта IT саласына кетпек. Еуропадағы беделді университетке түсуді жоспарлап отыр. Отбасындағы 4 баланың үлкені мектепті абыройлы тәмамдап, туған өлкенің дамуына өз үлесін қосуды армандайды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.