Коммуналдық тарифтер өскен жоқ

Ақтау қаласының тұрғындары жылу, су, жарық тарифтеріне байланысты мәселе көтерген болатын. Олардың айтуынша, соңғы үш айда баға шарықтап кеткен. Мәселен, 17-шағын ауданда орналасқан «Айрақты» тұрғын үй кешені тұрғыны әлеуметтік желіде өз мәселесін көтерген, үйінде үш адам бола тұра электр энергиясына 11 мың теңге төлеген. Ал 6-шағын аудан тұрғындары ыстық су бағасының едәуір көтеріліп кеткенін жазған. Осы мәселе бойынша Ақтау қалалық әкімдігінде баспасөз конференциясы өткен болатын.

Баспасөз конференциясына келген жауапты мамандар тұрғындар мен журналистердің сұрағына жауап берді.

Олардың айтуынша, 2019 жылы бекітілген тариф өспеген, сол күйінде сақтаулы. Бірақ ауа-райының былтырғы қыс мезгілімен салыстырғанда суық болуына байланысты ыстық судың температурасы көтерілген. Сондықтан баға да соған сәйкес жоғарылаған.

- Қала бойынша ыстық судың температурасын Ақтау қаласы әкімінің бұйрығымен бекітілген график бойынша ұстап отырмыз, - дейді «МАЭК-Қазатомөнеркәсіп» ЖШС өкілі Бекзат Сұлтанов.

Ал «Каспий жылу, су арнасы» мемлекеттік коммуналдық мекемесінің өкілі Азамат Қымбатов су, жылу, жарық бағасының көтерілуі мәселесіне өздерінің қатысы жоқ екенін айтады.

- Біз «МАЭК»-тің жасақтаған энергиясын тасымалдаушы мекемеміз. 2019 жылдың қаңтар айында бекітілген тарифтеріміз еш өзгерген жоқ. Керісінше біз бекітілген тарифтерді түсіріп, сол бағамен әлі күнге дейін жұмыс жасаудамыз. Ыстық су, жылу бойынша көтеріліп жатқан мәселеге біздің қатысымыз жоқ, - деді ол.

Айгүл ОРЫНБАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.