Маңғыстауда ІІІ тоқсаннан бастап кезекші сыныптар ашылады

Маңғыстау облысында 1-5 сынып аралығындағы оқушыларға 15 баладан аспайтын кезекші сыныптар ашылады. Ал 9 және 11 сыныптар 70% дәстүрлі, 30% қашықтан оқу форматына көшеді, - деп хабарлайды mangystaumedia.kz.

Бұл туралы Маңғыстау облысының қоғамдық коммуникация орталығында өткен брифингте МО санитариялық-эпидемиологиялық департаментінің басшысы Ғазиз Надуев айтты.

«2020-2021 оқу жылының үшінші тоқсанынан бастап жаңа қаулыға өзгерістер енгізілді. Ата-аналардың өтініші бойынша жалпы білім беретін мектептерде 1-5 сыныпқа дейін кезекші сыныптар ашылады. Санитарлық-эпидемиологиялық талаптарды сақтай отыра, 9-11 сыныптар үшін 70% дәстүрлі, 30% қашықтықтан оқыту форматына көшіріледі. Ал, техникалық және кәсіптік, орта білімнен кейінгі білім беру ұйымдарында, жоғары және жоғары оқу орнынан кейінгі білім беру ұйымдарында 1 курс студенттері 2020-2021 оқу жылының II семестрінен бастап аралас форматқа көшіріледі», - деді Ғазиз Надуев.

Ал, Маңғыстау облысы білім басқармасы басшысының міндетін атқарушы Гүлмира Мамаеваның мәліметінше, пәндердің 70% дәстүрлі, 30% қашықтан оқыту форматында өтеді. Білім беру орындары санитайзерлермен, тепловизорлармен, бактероцидтік лампалармен, т.б. қамтамасыз етілген. Барлық мектептердегі медициналық пункттер күшейтілген режимде жұмыс істейді. Бастауыш сыныптардың сабақтары таңғы сағат 09.00-де, жоғары сыныптарға түстен кейін 14.00-де бастау ұсынылады. Сабақтар ұзақтығы 40 минут, үзілістер кестесі әр сынып үшін бөлек жасақталады.

«Қазіргі кезде 15 баладан аспайтын, 1-5 сынып аралығында 77 463 бала келеді деп жоспарланып отыр. Ал, 9 және 11 сыныптарға келсек, олар аралас форматта оқытылады. Бұл сыныптарда математика, қазақ тілі, орыс тілі, шет тілі, физика, химия, биология, алгебра, геометрия, тарих және т.б. пәндер мектепте оқытылады. Пәндердің 70%-ы штаттық форматта мектепте өтсе, 30%-ы қашықтан оқытылады. Жалпы алғанда мектеп бітіруші сыныптардың түлектері үшін оқу жылының соңында қорытынды аттестаттау, колледждерде кешенді емтихандар, 11-сынып оқушылары жоғары оқу орындарына түсу үшін ҰБТ, және бастауыш сынып оқушыларының оқу бағдарламаларын сапалы меңгеру жайы ескерілді. Ал, білім беру мекемесі әкімшілігінің шешімі бойынша сабақтан тыс уақытта 5 адамнан аспайтын топтарда оқушыларды жеке оқытуға рұқсат беріледі », - деді Гүлмира Мамаева.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.