Маңғыстау облысында  44 діни бірлестік бар

Бұл туралы Қоғамдық коммуникация орталығында өткен брифингте Маңғыстау облысы дін істері басқармасының басшысы Мақсатбек Маханбетов айтты, - деп хабарлайды mangystaumedia.kz.

Оның ішінде, 33-і Қазақстан мұсылмандары діни басқармасының филиалы, біреуі православтық, біреуі римдік-католиктік, 8-і протестанттық, біреуі кришнаидтік діни бірлестігі.

Маңғыстау облысы дін істері басқармасының басшысының айтуынша, облыс тұрғындарының басым бөлігі мұсылмандар мен православ христиандарынан құралған. Өңір бойынша 36 ғибадат үйі жұмыс істейді (мешіттер – 33, православ шіркеуі – 1, «Маңғыстау облысындағы Христиандық Жаңа апостолдық шіркеуі - 1, «Рақым сөзі» Інжілдік Мәсіхші Баптистер қауымының шіркеуі -1). Облыс аумағында миссионерлік қызметті 16 азамат жүзеге асырады ( 3 шетелдік және 13 қазақстандық): римдік католиктік-3 (Белорусь, Польша,Қазақстан), «Ақтау Кришна санасының бірлестігі» -13 (Ресей, Қазақстан).

«Маңғыстау облысындағы діни ахуал тұрақты. Конфессияаралық қақтығыс оқиғалары орын алмады. Жалпы діни ахуал үнемі бақылауда. Қазір Маңғыстауда 8 мешіттің құрылысы жүріп жатыр. Қосымша 5 (Ақтау қ., Баутин е.м., Маңғыстау-5 е.м., Қызан е.м., Теңге е.м.) мешіттің қажеттілігі туындап отыр. Дін істері басқармасы мешіт құрылыстарына қатысты талдау, реттеу жұмыстарын өз бақылауында ұстайды. Әкімдіктің арнайы шешімінсіз мешіт құрылысын жүргізуге жол берілмейді», - деді М. Маханбетов.

2020 жылы дінге қатысты 15 әкімшілік құқық бұзушылық тіркелді. Оның ішінде 12 азаматқа жалпы соммасы 1 324 550 теңге көлемінде айыппұл салынды. Бесеуі рұқсатсыз діни әдебиет таратқаны үшін, алтауы діни рәсімдерді өткізу талаптарын бұзғаны үшін, 2 әлеуметтік желіде діни материалдарды жариялағаны үшін, 2 мешіттің қызмет жасауына кедергі келтіргені үшін жауапкершілікке тартылған.

Облыста 8 ақпараттық түсіндіру тобы (бұдан әрі-АТТ) жұмыс істейді. Ақпараттық түсіндіру тобының құрамына мемлекеттік қызметшілер, діни бірлестіктер, ҮЕҰ, ардагерлер, БАҚ, мәдениет және спорт өкілдері, жастар ұйымдары, құқық қорғау органдары, дінтанушы және теологтар, ҚХА өкілдері кіреді.

«Еліміздегі карантин жағдайына байланысты ақпараттық-түсіндіру жұмыстары онлайн («ZOOM» платформасымен) және офлайн кездесулер арқылы өткізілді. 2020 жылы АТТ 251 офлайн, 326 онлайн іс-шара жүргізді. Оған 35 324 адам қамтылды (оффлайн – 11 244, онлайн - 24 080). Мақсатты аудиториясы колледж студенттері, әскери бөлімнің қызметкерлері, сауда орталықтардың сатушылары, емхана қызметкерлері, мектеп оқушылары және ұстаздар, мемлекеттік мекемелерінің қызметкерлері мен жастар орталықтары болды», - деді Мақсатбек Маханбетов.

Сондай-ақ, діни экстремизм идеологиясына қарсы ақпараттық бұйымдар дайындау бағытында 129 кітап, 4 000 буклет сатып алынып, «Ашық аспан» акциясы аясында көпшілікке таратылған.

2020 жылы «Интернет терроризм», «Діни фанатизм», «Дисфункциональная семья», «Откровения» секілді бейнематериалдар жинақталып, облыстық «Маңғыстау» телеарнасында «Сирия сергелдеңі» тақырыбымен журналисттік зерттеулер жүргізіліп, 22 бейнебаян әлеуметтік желілерде жарияланған.

Баспасөз конференциясына Маңғыстау облыстық «Бекет ата» мешітінің бас имамы Әнуар Елжанов та қатысты.

«Дәстүрлі емес діни ағым өкілдерімен жүргізілген жалпы профилактикалық іс-шаралар бойынша 39 кездесу өткізіліп, 500-ге жуық адам қамтылды. Жеке кездесулер саны – 63. Аталмыш кездесулердің нәтижесінде 62 адам дәстүрлі ханафи мазһабына бетін бұрса, соның ішінде 4 адам толық оңалды», - деді Әнуар Елжанов.

Оның мәліметінше, Маңғыстау облысында 36 мешіт бар. Оның ішінде Ақтау қаласында 2, Жаңаөзен қаласында 5, Қарақия ауданында 4, Мұнайлы ауданында 6, Маңғыстау ауданында 9, Бейнеу ауданында 6 және Түпқараған ауданында 4 мешіт. Діни нысандарда 120 имам-ұстаз қызмет етеді.

Пандемия кезінде Маңғыстау облыстық мешіттері мен «Зекет» корпоративтік қоры 1 350 қап ұн таратты. 2020 жылы 19 616 отбасыға көмек беріліп, қайырымдылық жұмыстары нәтижесінде 41 004 000 теңге жиналды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.