«Westecoplast» ЖШС 2022 жылы «Ақтау теңіз порты» арнайы экономикалық аймақ аумағында іске қосылды. Кәсіпорын жылына сыйымдылығы 25 келіден бастап 2 тоннаға дейін жететін 6 млн қап шығарады, деп хабарлайды mangystaumedia.kz қоғамдық коммуникация орталығына сілтеме жасап.
«WestEcoPlast» ЖШС директоры Кирилл Демченконың айтуынша, жергілікті зауыт өнімдері — қапшықтар мен биг-бэгтер өте сапалы және шетелдік балама түрлерінен кем түспейді.
- Зауытта ай сайын 400 мың шағын қапшық, 150 биг-бэг өндіріледі. Дайын өнім Ақтөбе, Жамбыл облыстарына жөнелтіледі. Қапшықтар көбіне қант, ұн өнімдерін салуға да пайдалынылады. Кез-келген химиялық элементтерді де салуға болады. Ең бастысы тауар сапасы бәсекеге қабілетті әрі нарықтағы әлеуеті жоғары,-дейді зауыттың директоры Кирилл Демченко.
Сонымен қатар кәсіпорын басшысының айтуынша қапшық сырты тапсырысқа сай арнайы логотиптермен таңбаланады. Компанияда 110 жұмысшы қызмет атқарады. Кирилл Демченко алдағы уақытта өндіріс қуатын ұлғайып, жұмысшы санын 2 есе көбейту жоспарда бар екенін айтты. Сондай-ақ, ішкі нарықтың сұранысын қамтамасыз етумен қатар өнімді шет елге экспорттау жоспарда бар екенін тілге тиек етті.
Ғалымжан Дүйсен қап шығаратын зауытта 3 жылдан бері еңбек етеді. Бастапқыда қатардағы жұмысшы болған ол, бүгінде ауысым басшысы.
-Уақыт өте оператор бөліміне ауыстым. Бүгінде ауысым басшысымын. Орташа жалақымыз— 200 мың теңге. Өзіме жұмысым ұнайды. «Еңбегі аздың өнбегі аз» демекші, қандай жұмыс болсын жасауға дайынмын. Тәжірибе уақыт өте келеді, ер азамат еңбек ете жүріп жетістікке жетеді, - дейді Ғалымжан Дүйсен.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
