Мемлекет басшысы жуық арада кредитке қатысты ұсыныс жасамақ. Бұл жөнінде Президент Талдықорғанда халықпен кездесу барысында айтты, деп хабарлайды mangystaumedia.kz 31-арнаға сілтеме жасап.
– Мен тағы бір күрделі мәселеге тоқталғым келіп отыр. Елімізде көп адам несие алып, берешегін өтей алмай жүр. Бұл мәселе мені де қатты алаңдатады. Таяу арада мен осы мәселе бойынша ұсынысымды халыққа жариялаймын, - деді ҚР Президенті Қасым-Жомарт Тоқаев.
Президент нақты қандай ұсынысты, қашан айтатынын ашып айтпады. Ал экономистер егер мемлекет басшысы кредитке қатысты шешім қабылдаса, бірінші кезекте банктердің тұтынушыларға беретін кредиттің жылдық пайызын азайту керек дейді. Екіншіден, көбейіп кеткен микрокредитті ұйымдардың жұмысын тоқтатуды да ұсынып отыр. Себебі, бұл ұйымдар кез келген адамға несие беріп, бір айдың ішінде алған ақшасын толық қайтармаса, үсті-үстіне пайыз қосып, халықты әбден қарызға батырып жатқанын айтады. Үшіншіден, бір адамның басында несие болса, ол қарызын өтемейінше екінші кредит берілмеу керек дейді. Мамандар, несиеге қатысты шешімді барынша қатаңдату қажет деп отыр. Себебі, қазір халық бір кредитті жабу үшін екіншісін алып, амалдап өмір сүріп жатқанын айтады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
