Алдағы он жылда елімізде көмір мен мұнай тұтынбайтын кезең басталуы мүмкін

Алдағы 20 жылда барша қазақтың болашағы осы швед азаматы Вольфганг Кропқа тікелей байланысты болуы мүмкін, деп хабарлайды mangystaumedia.kz.

Журналист Айбар Олжаевтың жазуынша, Швецияда тіркелген Еуроодақтың жасыл энергетикадағы алпауыт компаниясы - "SVEVIND Energy Group" төрағасы Вольфганг Кропп әлемдегі инвесторларды Қазақстанда мыңдаған жел мен күн генераторларын қойып, одан келетін экологиялық таза электр энергиясына "жасыл" гидроген (сутегі) өндіретін зауыт жасауға көндірді. Болашақта Каспий түбіне қойылатын зауыт "HYRASIA ONE" деп аталатын болады.

«Маңғыстау жазығында Шыңғысханның әскерінен де көп күн батареялары мен жел генераторы салынады. Олар 40 гигаватт қуат береді. Осы энергия Каспий теңізінің жағалауындағы электролизерлерді айналдырады. Сонда зауыт жылына екі миллион тонна жасыл гидроген (сутегі) өндіреді. Бұл 2030 жылы Еуроодақ тұтынуы мүмкін барлық сутегі көлемінің 20 пайызы. Бір сөзбен айтқанда, бұл сутегі әлеміндегі жаңа Қашаған, Теңіз кен орындарына пара-пар. Демек, ертең мұнай бітсе де, қазақтың берекесі бітпейді деген сөз. Біз жаңа мұнай - гидрогеннің әлемдегі ірі ойыншысына айналамыз. 50 миллиард доллар тұратын жобаны әлем инвесторларының пулы қаржыландырады. Бұл біздің Ұлттық қормен тең. Біз өзіміз ондай ештеңе сала алмас едік. Технологиямыз да, ақшамыз да жоқ. Сондықтан бізді таңдаған, біздің перспективамызға сеніп отырған Кропп сынды азаматтарды бағалауымыз керек», - деп жазды Айбар Олжаев.

Оның сөзінше, 2022 жылдың қазан айында HYRASIA ONE Қазақстан үкіметімен Инвестициялық келісімге қол қойған. Биыл жобаны әзірлеудің бірінші кезеңі сәтті аяқталды. "ILF Consulting Engineers" пен "Roland Berger" инженерлері концепциялық зерттеу жұмыстарын бітіріп, инвесторларға тапсырып отыр.
«Жоспар бойынша Қазақстан 2030 жылы алғаш рет гидроген өндірмек. Ал 2032 жылы біздегі теңдессіз технологиялық зауыт өзінің толық қуатына шығатын болады. Осы жұмыс орындалса, онда біз (көмір мен мұнай жақпайтын) жаңа дәуірге ауысатын боламыз», - деп жазды Айбар Олжаев.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.