Биыл Алматы қаласында «Ынтымақ» өнер-білім орталығы ұйымдастырған «Тұғыры биік Тәуелсіздік» атты І Республикалық онлайн-байқау өтті. Еліміздің әр аймағынан небір өнерлі жеткіншектер қатысқан бұл додада біздің өңірден кішкентай Тәсним Қозыбағар да бақ сынап көрген болатын. Тәснимнің бала қиялынан туындаған әсем туынды әділқазылардың қатаң сынынан өтіп, қызымыз байқаудың Бас жүлдесін алды. Мұнымен қоса «Көрермен көзайымы» да осы маңғыстаулық қаршадай қызға бұйырды. Ал Тәснимді осынау сынға дайындағаны үшін оның жетекшісі Ақсұлу Жұмагелдинаға «Үздік жетекші» дипломы берілді. Қуанышты хабарды жеткізген Т.Қозыбағардың анасы Камила Тасқымбайқызы баланың конкурстан қос марапат алуына Ақсұлу Орынғалиқызының қосқан үлесі қомақты екенін айтты.
- Қызым қосымша білім педагогы Ақсұлу Жұмагелдина жетекшілік ететін «Қолөнер шеберханасы» және «Сурет студиясы» үйірмелеріне алты жасынан қатыса бастады, - дейді ол. - Іс тігетін инені қызымның қолына алғаш қалам ұстатқандай ұстатып, қол өнерінің қыр-сырын үйретіп келеді. Балалардың еркелігін көтеріп, қабілетін анықтап, шыңдалуына ат салысып, көптеген конкурс-шараларға қатыстырып, ынтасын арттырып, үнемі қолдап жүретін да осы ұстазы—Ақсұлу апайы. Қызымның сурет салуға да қызығушылығын оятып, жетістіктерге жетуіне көп септігін тигізді. Ең алғаш өз қолымен жасаған бұйымын үйге алып келгендегі қызымның қуанышы әлі көз алдымда. Биыл Тәсним тоғыз жасқа толады. Осы уақытқа дейін үйірмеден үйренгені өте көп. Өткен жылдары апайының жетекшілімен ұйымдастырылған сән көрсетілімі қызымның сән әлеміне қадам басуына ықпал еткен еді. Ақсұлу Орынғалиқызына айтар алғысым шексіз.
Ұстазы жақсының ұстанымы жақсы. Мейлі, ол білім берсе де, өнер үйретсе де, тек тәбие берсе де. Қанатыңды қомдап ұшқаныңда, сол ұстазыңның тәлімі өмірлік ұстанымыңа айналып кете береді. Ақтау қаласындағы «Оқушы орталығының» қосымша білім педагогы А.Жұмагелдина да бір емес, бірнеше баланың қиялына қанат бітірген ұстаздардың бірі. Шәкірттерді өнерге баулумен қатар оларға өнегелі тәлім-тәрбие беріп, жақсы қасиеттерді бойына дарытып, мейірімді, бауырмал, жанашыр дос болуды үйретіп, адамгершілік рухта бағыт-бағдар беріп келе жатқан ол үнемі қызықты демалыстар, көңілді кездесулер, табиғат аясына саяхат ұйымдастырып, балалардың ортасында жүреді. Сөздерін жерге тастамай, уақыт тауып, балаларға жеке қолдау көрсетуден жалықпайтын тәлімгерге ата-аналар да дән риза. Оның еңбегі ескеріліп, алған марапаттары да аз емес. ҚР Білім және ғылым министрлігі Республикалық қосымша білім беру орталығынан Алғыс хаттар, облыстық, қалалық білім басқармасы мен бөлімінің Алғыс хаттары мен грамоталары, түрлі деңгейдегі конкурстардан алған дипломдары бар.
Өнерлі ұстаздың кішкентай шәкірті де марапаттан құралақан емес. Алғаш рет 2018 жылы ҚР ҰҚК Шекара қызметі әскери қызметшілерінің балалары арасында өткен ҚР Тәуелсіздік күніне арналған «Гүлдене бер, менің Қазақстаным» атты суреттер байқауына белсене қатысқаны үшін алған Грамотасы баланы алға қарай ұмтылдыра түскендей еді. Бұдан кейін де балауса өнерін паш еткен алуан сайыстардан топ жарып келеді. Лайым солай жалғаса бергей.
Валентина ҚОЗЫБАҚОВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
