"Қарапайым заттар экономикасы" Маңғыстау облысында қалай жүзеге асырылуда?

"ҚазАгро" ұлттық басқарушы холдингінің "Аграрлық несие корпорациясы" АҚ Маңғыстау облысында "Қарапайым заттар экономикасы" даму бағдарламасын қарқынды жүргізе бастады. Ол ішкі нарықты отандық тауарлармен толықтыруға ниет білдіргендерге кеңесті де көмекті де аямады. Енді соның алғашқы нәтижесін көрсету мақсатында  "ҚазАгро" ұлттық басқарушы холдингінің "Аграрлық несие корпорациясы" БАҚ өкілдеріне көшпелі отырыс ұйымдастырды. Жаңа жылдан бастап облыс тұрғындарын жағымды жаңалықтар көп кутуде. Соның бірі - құс фабрикасы. Түпқараған ауданындағы «Ақтау-Агро» ЖШС құс фабрикасының құрылысы қарқынды жүзеге асырылып келеді. Заманға сай салынып жатқан фабрикалар тек озық  технологиялар пайдаланылмақ. - 2017 жылы «Ақтау-Агро» ЖШС құс фабрикасының құрылысы басталды. Фабриканың қуаттылығы жылынабес мың тонна деп жоспарланған. Фабрикамыз төрт алаңнан тұрады. Біріншісі – инкубаторлық цех, екіншісі – құс ғимараттары, үшіншісі – тауықты сойып, дайындайтын орын және төртіншісі – құрама жем зауыты. Қазіргі таңда 16 ғимарат салынған. Болашақта әрбір ғимараттың ішінде 31 800 тауық өсіріледі. Біз жұмыртқаларды Ресей елінің немесе Түркия елінен алдыртатын боламыз. Маңғыстаудың 50 пайызын құс етімен қамтамасыз етуді көздеп отырмыз. Бұл көрсеткішті 100 пайызға дейін жеткізу үшін қуаттылығымызды күшейтуге мүмкіндігіміз бар. Ол үшін аталық пен аналықты шығарып, жұмыртқаны инкубаторға салып, тауыққа дейін өсіреміз. Бұлар болашақта жасалатын жоспарлар. Жоба құны – 4 млрд 600млн. теңгені құрап отыр. Оның 1 млрд.-тан астамы - өз қаражатамыз болса, қалғанын «Аграрлық несие корпорациясынан» несие етіп алдық. Құс фабрикасының құрылысы 80 пайызға бітіп тұр. Монтаждық жұмыстар жүргізілуде. Фабрика есігін 2020 жылдың шілде айында ашпақ, - дейді «Ақтау-Агро» ЖШС директоры Данияр Тұрғынов. «Аграрлық несие корпорациясы» көмектескен келесі кәсіпкер – «Сарман Жалғасбек Байшылықұлы» шаруа қожалығы. Алғашында жылқы бағып бастаған жігіт ағасында қазір екі үйір жылқы мен 17 түйе бар. "Бұл шаруаны 2005 жылы бастадым. Жылқы алып бастадық, одан соң 2012 жылы түйеге ауыстық. "Қарапайым заттар экономикасы" бағдарламасы бойынша 5%-бен 7 жылға 70 млн теңге қолжетімді несие алып, оны 88 бас түйеге есептеп отырмыз. Болашақта сүт, шұбат, балқаймақ және тағы басқа сүт өнімдерін шығарғымыз келеді. Қазір басты мақсатымыз – мал басын көбейту", - дейді шаруа қожалығының жетекшісі Сарман Байшылықұлы. Бұл екі кәсіптің және басқалардың дамуына жол ашқан "Аграрлық несие корпорациясы" Маңғыстау облысында 2018 жылы құрылған. "2019 жылы 50 қожалық несие алды. Аграрлық несие корпорациясы ауыл шаруашылығының дамуына сүбелі үлесін қосуда. Жоспарлар көп. Облыста бес үлкен инвестициялық жоба жасалып жатыр. Атап өтсек – Түпқараған ауданында орын тепкен "Намазғали" ШҚ, "Ақтау Агро" ЖШС жобасы және тағы басқалар. Елге, халыққа пайдалы болар жобаларды қолға алып, дамуына септігін тигізудеміз. "Аграрлық несие корпорациясы нан" несие аламын деушілер болса, бұл "Қарапайым заттар экономикасы" бағдарламасы келер жылы да жалғасады. Бұл мақсатта өңірге бөлініп тұрған сома көлемі – 2 млрд теңгені құрайды", - дейді "Аграрлық несие корпорациясы"АҚ Маңғыстау облыстық филиалының директоры Ерболат Оңғарбек.