Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
Бүгін аймақ басшысы Рио Олимпиадасының күміс жүлдегері Әділбек Ниязымбетов пен оның бапкері Марат Жакиевті арнайы қабылдап, «темір тұлпарды» сыйға тартты. М. Жакиевке Toyota Land Cruiser 200 және Әділбекке Toyota Land Cruiser Prado көлігін мінгізді. Сондай-ақ Берік Әбдірахмановқа 5 миллион теңгенің сертификатын тарту етті.
Алдымен өңір басшысы байрақты бәсекеде ел намысын абыроймен қорғаған Әділбек пен бапкерін жеңістерімен құттықтады. Жерлестерін қуанышқа кенелткен талантты ұлды тәрбиелеген ата-анасы мен бапкері Марат Жакиевке алғысын білдірді.
- Әділбек, айналайын екінші рет Олимпиадада жүлдегер атанып, жерлестеріңді қуанттың. Мұндай жеңістер Маңғыстау спортының тарихында бұрын болған емес. Түбектің намысын абыроймен қорғап, сенімімізді ақтаған өзіңе ризашылығымды білдіріп, алғысымды айтқым келеді. Берік ініміз болса, Олимпиадаға ең алғашқы болып жолдама алған спортшы екенін барлығымыз білеміз. Бұл жолы медаль бұйырмаса да, алда сені жеңісті күндер күтіп тұр деп сенеміз. Осындай талантты спортшыны тәрбиелеп, облыс спортын биік дәрежеге көтерген белгілі бапкер Марат Жакиевке алғыс айтамын. Әділбектің финалын маңғыстаулықтар болып үлкен экраннан теңіз жағасында тамашаладық. Олимпиадада сәтті өнер көрсетіп, жеңіс сыйлаған Әділбекке ризамыз. Еңбектеріңізді маңғыстаулықтар әрдайым бағалайды, - деген облыс әкімі Алик Айдарбаев темір тұлпардың кілтін салтанатты түрде табыс етті.
Өз кезегінде былғары қолғап шеберлерінің бапкері Марат Жакиев қолдау көрсеткен жерлестеріне алғысын жеткізді.
- Финалға шығатын күні whatsApp арқылы маңғыстаулықтардың теңіз жағасында үлкен экраннан қарап, қолдау көрсететіні жайында хабарлама келді. Мұның өзі Әділбекке рухани күш жігер берді, жеңіске жетуіне сеп болды. Бұл тек ғана Әділбектің жеңісі емес, бүкіл маңғыстаулықтардың жеңісі деп есептейміз. Облыста спортты дамытуға қолдау көрсетіп, демеу болып жүрген баршаңызға алғыс айтамын. Сый-құрметтеріңізге ризашылығымызды білдіреміз, - дейді Марат Жакиев.
Венера МИРЛАН Суреттерді түсірген Талант ҚҰСАЙЫН
[gallery td_select_gallery_slide="slide" ids="8870,8869,8865,8872,8874,8875"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.