Биыл Бейнеу мен Мұнайлыда сумен қамту бойынша 4 жоба іске асады
[ 2019 ] 3 маусым, 13:08 | Жаңалықтар
Ақтау қаласы орталықтандырылған ауыз сумен 100%, ал облыстағы ауылдық елді мекендер 69% қамтамасыз етілген. 2019 жылы Бейнеу ауданының Сарға, Есет, Төлеп ауылдары мен Мұнайлы ауданының Басқұдық ауылында 4 жоба іске аспақ. Соның нәтижесінде бұл көрсеткіш 75,8 % жетеді. Бұл туралы аппараттық жиында Маңғыстау облысының Энергетика және тұрғын үй-коммуналдық шаруашылық басқармасының басшысы Жандос Салимов мәлімдеді, - деп хабарлайды mangystaumedia.kz сайты.
Баяндамашының айтуынша, былтыр орталықтандырылған сумен қамтамасыз ету бойынша Бейнеу ауданының Боранқұл және Мұнайлы ауданының Маңғыстау-4 ауылдарында 2 жоба іске асты.
"Бұдан басқа орталықтандырылған сумен бұрыннан қамтамасыз етілген ауылдық елді мекендердегі жаңадан салынып жатқан жер телімдерін қамту мақсатында 12 жоба іске асырылып жатыр", - деді басқарма басшысы.
Қалалардағы орталықтандырылған су бұрумен қамтамасыз ету көрсеткіші – 93,1% құрайды.
«Өңірлерді 2020 жылға дейін дамыту» бағдарламасының аясында Шетпе ауылындағы 2 жоба іске асырылуда. Нәтижесінде ауылдық елді мекендердегі орталықтандырылған су бұрумен қамтамасыз ету 2019 жылы 7,1 % жетпек.
Сонымен қатар 2019 жылы «Ақтау қаласындағы КОС-1 бастап КОС-2 дейінгі өздігінен ағатын кәріз коллекторының құрылысы» жобасын іске іске асуда. Бұл жобаны іске асыру тазартылмаған ағынды суларды КОС-2 алаңына айдауға мүмкіндік бермек.
Елді-мекендерді сумен жабдықтау және су бұру жүйелерін дамыту мәселелері қаралған жиын соңында Маңғыстау облысының әкімі Ералы Тоғжанов тұрғындарды сапалы ауыз сумен қамтамасыз ету басты міндеттердің бірі екенін атап өтті.
1121
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
