ҚазМұнайГаз "Қаламқас" кен орнындағы апат туралы ақпарат таратты
[ 2019 ] 26 наурыз, 04:46 | Жаңалықтар
«ҚазМұнайГаз» ҰК АҚ баспасөз қызметі "Қаламқас" кен орнының ұңғымасында болған жағдай туралы ақпарат таратты. Қазір өрт шыққан жерге 53 адам мен 12 өрт сөндіру техникасы жұмылдырылған. Бірақ өрт ошағына кірме жолдардың болмауынан өртті ауыздықтау мүмкін болмай отыр, - деп хабарлайды mangystaumedia.kz сайты.
«ҚазМұнайГаз» ҰК АҚ баспасөз қызметінің мәлімдеуінше, апат ұңғыманы жуу кезінде пайда болған.
"2019 жылғы 13 наурызда «Маңғыстаумұнайгаз» АҚ-ға қарасты Қаламқас кен орнының күрделі учаскесінде ұңғыманың құрылысы барысында кен орнының орталық бөлігіне тән техногендік сипаттағы газ-су аралас табиғи бұрқағы шыққан. Наурыздың 13-24 күндері мамандар күрделендірілген бұрғылау ерітіндісімен ұңғыманы жуу жөніндегі жұмыстарды, сондай-ақ грифондарды жою үшін жөндеу-оқшаулау жұмыстарын жүргізді", - делінген хабарламада.
2019 жылғы 25 наурызда сағат 05:46-да (Нұр-Сұлтан қ. уақыты бойынша) 8232 ұңғыманың аумағында 16 наурызда жер бетіне шыққан газ-су қоспасының
ошағы жана бастады. «Семсер – Өрт сөндіруші» ЖШС жауынгерлік тобының шақырылған орынға келу уақыты 05 сағат 58 минут. Қайтыс болғандар мен зардап шеккендер жоқ.
https://www.youtube.com/watch?v=o7HHBAfw-Io
2019 жылғы 25 наурызда сағат 14:30-ға қарай өртті ауыздықтау үшін қосымша Ақтау қаласының МӨҚҚ 6 өрт сөндіру тобы келіп жетті: 4 автоцистерна, 1 жылжымалы сорғы стансасы, 1 газ-су сөндіруші автомобиль.
Қазіргі уақытта өрт шыққан жерде Маңғыстау облысының ТЖД, «Семсер – Өрт сөндіруші» ЖШС және «Файр протекшн ЛТД» ЖШС жеке құрамының 53 адамы және өрт сөндіру техникасының 12 бірлігі жұмылдырылған.
"Өртті сөндіру барысында жанған жерді тасымалданатын лафеттік оқпандармен сөндіру үшін бірнеше рет талпыныстар жасалды, алайда өрт ошағына кірме жолдардың жоқтығына байланысты өртті ауыздықтау мүмкін болмады", - делінген ҚМГ таратқан ақпаратта.
Оперативті өрт сөндіру штабын Маңғыстау облысы ТЖД бастығы Қ.Б.Базарбаев басқаруда.
Штаб құрамына «Маңғыстаумұнайгаз» АҚ бас директорының бірінші орынбасары Б.А.Иманбаев, ҚМ Индустриялық даму және өнеркәсіптік қауіпсіздік комитеті департаментінің басшысы С.К.Қазақбаев, КӘАҚҚ РОШ Маңғыстау филиалының (бұрқаққа қарсы қызмет), «СиБу» ЖШС өкілдері және басқалар кірді.
Естеріңізге сала кетейік, ҚР Энергетика министрлігі «Қаламқас» кен орнының №8237 ұңғымасындағы төтенше жағдайдың себебін анықтау үшін
тергеу амалдары жүріп жатқанын мәлімдеген еді.
1653
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
