Коммуналдық қызмет құны төмендеді

Ақтау қаласында бірқатар коммуналдық қызметтердің тарифтері төмендетілді. Табиғи монополиялар субъектілері бойынша тарифтерді төмендету және уақытша өтемдік тарифтер енгізу туралы Табиғи монополияларды реттеу, бәсекелестікті және тұтынушылардың құқықтарын қорғау комитетінің аймақтық департаментінде өткен баспасөз брифингінде мәлімделді. Коммуналдық қыз­мет­тер­ге қатысты төмен­де­тілген тарифтер ту­ра­лы Табиғи монополияларды рет­теу, бәсекелестікті және тұтыну­шы­лардың құқықтарын қорғау коми­тетінің аймақтық департамент жетекшісінің орынбасары Бақыт Бекмұратов айтып берді. «Біз 2018 жылдың қараша-жел­тоқсан айларынан бастап тарифтерді түсіру жөнінде қызмет жасап келеміз. Ол туралы ақпарат құ­ралдарында мәлімдедік. Электр энергиясын «МАЭК» 13 теңге 12 тиыннан 11 теңге 64 тиынға тү­сірді. Яғни 11,3 пайызға түсірді. Ал «АУЭС» мекемесі 21 пайызға тү­сіріп отыр. Департамент осы ба­ғытта жұмыстар жүргізіп, нәти­жесінде 10 табиғи монополия су­бъекті коммуналдық қызметтер та­рифін төмендетті. Бұның барлығы ерік­ті түрде жүргізілді. Осылайша 14 қызметке қатысты тарифтер тө­мендетілді», – дейді Б. Бекмұратов. Бұл кәсіпорындар қатарында «МАЭК-Қазатомөнеркәсіп», АО «Маң­ғыстау электр желілерін бөлу компаниясы» (МРЭК), «Каспий жылу, су арнасы» (КЖСА), «Дария» МКК, «Өзен жылу» МКК, «Маңғыстау энергия» МКК, «Комуналдық қыз­мет» МКК. «Электр энергиясына Ақтау қа­ласы бойынша ең төменгі тариф ҚҚС-сыз – 14,80 теңге, яғни тариф құны 5,2%-ға төмендеді. Бұл тарифте өзге тарифтер жиынтығы көр­сетіледі. Яғни «МАЭК-Қаз­атом­өнеркәсіп» тарифі, «АУЭС» ком­па­ния­сының тарифі және электрмен жаб­дықтаушы компаниялардың та­­ри­фі. Жылумен қамту бойынша та­риф­тер құны 9,6%-ға, ауыз сумен қамту 4,5%-ға төмендетілді. Ал газ мәселесіне келер болсақ, біз тек жеткізу процесін реттейміз, оның тарифі 2%-ға төмендеді», – деді Бақыт Бекмұратов. Айта кетер жайт, төмендетілген тариф тек жеке тұлғаларға қатыс­ты болмақ, заңды тұлғалар үшін өз­герістер жоқ. Ақтау тұрғындары электр энер­гия­сын да үнемдей алады. Мұн­дай мүм­кіндік үш деңгейлі саралан­ған та­рифтің енгізілуінен туып отыр. «AllianceEnergoSnab-Ақтау» компаниясы үш деңгейлі сараланған тарифті енгізді. Бұл тұтынушыларда қаражатты үнемдеуге, ал мемлекетке электр энергиясын үнемдеуге, сондай-ақ тарифтің 4 пайызға тө­мендеуіне мүмкіндік берді. «AllianceEnergoSnab-Ақтау» электр жабдықтаушы компаниясы 2010 жылдан бері жұмыс істеп келеді. Маңғыстау облысында бұл компания электр жабдықтау, жылумен және сумен қамту салаларын­да «МАЭК-Қазатомөнеркәсіп» ЖШС-мен қызмет көрсету келісімі бойынша 2017-2018 жылдары жұмыс жүр­гізуде. Жаңа жылдан бастап компания электрмен қамту ұйымы қызметін қолға алды. «AllianceEnergoSnab-Ақтау» ЖШС филиалының директоры Абзал Тө­лемісов жаңа жүйе туралы то­лы­ғырақ айтып берді. «Біздің компания 2009 жылы құ­рылды. Электрмен қамту саласын­да тәжірибеміз көп. Маңғыстау об­лысында тиісті келісімшарттар жа­садық. Біз Ақтау қаласы бойынша электр энергиясын сараланған та­риф бойынша бөлетін бола­мыз. Сараланған электр энергиясы үнем­деуді мақсат етеді. Бұл ретте тұ­тынушылар қаржысын үнем­де­се, мемлекет электр энергиясын үнем­дейді. Осыған байланысты тұр­ғындар кей мәселелерді тү­бе­гей­лі түсінбегендіктен алаң­дау­шы­лық туған. Себебі бұған де­йін бұл мәселелер кезікпеген. Біз бұ­ған түсіністікпен қараймыз. Сол себепті құжаттарды қабылдауды 2019 жылдың 1 наурыз күніне дейін создық», – дейді Абзал Төлемісов. Филиал директорының сөзін­ше, «Дербес деректерді қорғау тура­лы» заңына сәйкес энергиямен жаб­­­дықтаушы компания «Аза­мат­­­­тарға арналған үкімет» ком­мер­­­­­циялық емес ұйымынан өз тұ­­­ты­нушыларының дербес дерек­те­рі туралы ақпаратты тікелей сұра­туға құқығы жоқ. Сондық­тан тұ­­тынушылар қажетті ақ­па­рат­ты өздері ұсынулары қажет. Құ­жат­тарды электрондық форматта ком­панияның aes-aktau@mail.ru пош­­тасы арқылы жіберу арқылы жү­зеге асырылады. Егер тиісті құ­жат­тар ұсынылмаса, қаңтар-ақ­пан айларының есепшоттарында (жи­ров­каларда) тұратындардың са­нына қарамастан, тұтынылған электр энер­гиясы үшін бірінші деңгейдегі (ең төмен) 16,58 теңге кВт/сағ.тарифы қолданылатын болады. Маңғыстау облыстық энергетика және тұрғын үй шаруашылы­ғы басқармасы басшысы Жандос Са­лимовтің айтуынша, көтеріл­ген та­қырып төңірегінде халық­тан сауал­­дар келіп түскен. Тұрғын­дар не­гі­зінен «электр энергиясына тө­ле­нетін ақы көтерілмейді ме және са­раланған тарифтердің сапа жағы қан­дай болады?» деген мәселелер қызықтырған. «Бұл электрмен қамту ұйымының әлеуеті, қызметі электр энергиясы жеткізудегі сапаны жақсарту­ға бағытталады. Келісімшарттар­ға сәйкес «AllianceEnergoSnab-Ақтау» компаниясы толықтай барлық шарт­­тарды, сондай-ақ оперативтік режимдерді, электр энергиясын жет­­­­кізу бойынша тапсырмаларды орын­­­дауға міндетті», – деп атап өтті Жандос Салимов. «AllianceEnergoSnab-Ақтау» бас­шылығы пәтерде тұ­ратын адамдар саны туралы толық ақпараттар­ға ие еместігін және мұндай деректер сұратуға құқылы емес­тік­терін түсіндірді. Бұл ретте сұ­ратылатын құжаттар – өтініш, от­­басы мү­ше­лерінің мекенжай анық­тамасы, сондай-ақ пә­тер ие­сі­нің немесе тіркелген құ­қықты тұл­­ғаның жеке куәлік кө­шірмесі. Бұл құжаттарды 1 нау­рызға дейін тұ­тынушыларға қыз­мет көрсету орталығы ор­на­лас­қан 10-шағынаудан, 1-үйдегі ме­­кенжайға өткізуі тиіс. Электр қуа­тын пайдаланған үшін төлем бұ­рынғыдай есептеу касса ор­та­лықтарында, сондай-ақ терминал­­дар мен электронды қо­сым­ша­­лар арқылы жүргізіледі. Ал тұ­­­­тынушылар құжаттары жи­нал­ған­­­нан кейін пәтерде тұратын адамдар саны толтырылып, компанияға өті­ніш жіберіледі, осының негізінде электр энергиясын тұтыну есебі жүр­гізілетін болады. Баспасөз брифингінде қаңтар айын­да тұтынушылар желтоқсан айы­ның төлемін жасайды, ал тө­мен­детілген тарифтер 2019 жылдың қаң­тар айынан бастап есептеліп, оның төлем есебі ақпан айында жібе­рілетіні хабарланды.

Жайық НАҒЫМАШ