Алаяққа алданған тұрғындар «Маңғыстау – адалдық алаңына» арызданды

ҚР Президенті жанындағы мемлекеттік басқару академиясының Маңғыстау облыстық филиалында білімін жетілдіріп жатқан тыңдаушыларға «Маңғыстау – адалдық алаңы» жобалық кеңсесі таныстырылды. Жоба туралы агенттіктің аумақ­тық депар­та­менті­нің сыбайлас жемқорлық профилактика­сы бас­­қармасының бас маманы Ербол Жұма­бай то­лығырақ түсіндіріп өтті. Негізгі міндеттері – тұрғындар­дың сыбайлас жемқорлыққа қар­­сы мінез-құлық үлгісін одан әрі дамыту мен жемқорлық мәселесін мемлекеттік қыз­мет көрсету сапасын арттыру арқылы шешу, тұр­мыстық жемқорлықты жою, азаматтар жә­­не бизнес үшін кедергісіз, қолайлы жағ­­дай­лар жасау, мемлекеттік органдар қыз­ме­ті­нің ашықтығы, ауқымды қоғамдық ба­қылау жүргізу. Жоба аясында мемлекеттік мекеме қыз­меткерлерінің ең­бек­ақысын қайта қа­рау, ме­ке­ме басшыларының жеке жауапкер­ші­­­лігін арттыру, қызметтердің барлық ба­ғыты бойынша сыбайлас жемқорлыққа қар­­сы іс-қимылды арттыру және тағы басқа мәселе­лер қамтылады. Маңғыстау тұрғындары мен қонақтары мемле­кеттік органдардың қыз­метін жақсарту және сыбайлас жем­қор­лықтың деңгейін төмендету, жою бойынша өздерінің ұсыныстарын енгізе алады. Сондай-ақ жұмыс барысында туындаған мәселелерді қарау үшін кәсіпкерлер, ғалымдар, азаматтық сектордың және БАҚ өкілдері арасынан сарапшылар тартылмақ. Сонымен қатар «Маңғыстау – адал­дық алаңы» жобасына сәйкес сыбайлас жемқорлыққа қар­сы іс-қимылда жаңа әдістер енгізу мақсатында жоба менеджменті қол­данылатын болады. Ол мақ­сат­та жоба аясында Маңғыс­тау об­­лысы әкімдігінің, жергілікті ат­­қа­ру­шы органдар қызметкерлері қа­­та­рынан жоба кеңсесі құрылып, тұрғындардың тұрмыс сапасын арт­ты­­­ру­ға бар күшімізді саламыз деген тілегін жеткізді. Айта кету керек, жо­балық кеңсе «Сыбайлас жемқорлықтан ада өңір­лер» атты жобаны жү­зеге асыру аясында елі­міздің барлық облыстарында ашылған болатын. Академия тыңдаушыларының алдында сөз сөйлеген агент­тіктің аумақтық департамен­ті басшысының орынбасары Ерлеген Менда­лиев қолға алынған жоба аясында бірқатар ауқым­ды жұмыстар атқарылатынын айтты. «Елбасы Нұрсұлтан Назарбаев өзінің Қа­зақстан халқына «Қазақстандықтардың әл-ауқатының өсуі: табыс пен тұрмыс сапа­сын арттыру» атты Жолдауында сыбайлас жемқор­лықпен күресті жалғастыру керек­тігі айтылған болатын және «Сыбайлас жемқорлықтан ада өңірлер» жобасы аясында жобалық кеңселердің ашылуын қамтамасыз ету тапсырылған. Осы жо­баның жүзеге асырылуы өңір тұрғындары арасында сыбай­лас жемқорлыққа қарсы мәдениетті қалыптасты­ру бойынша өз жемісін береді деп сенеміз. Бұл бастама облыс әкімдігі тарапынан қолдау тапты. Сіздер де өз үлестеріңізді қоса аласыз­дар және осы бағытта атқарылатын жұмыстар­ды жандандыруға белсенді түрде атсалысу­ға шақырамын», – деді ол. Сонымен қатар «Маңғыстау - адалдық ала­ңы» жобалық кеңсесі өз жұмысын бастап кетті. Мұнайлы ауданының бір топ тұр­ғындары жер учаскесін сату­мен ай­налысатын алаяқтарға ал­дан­ғандарын айтып, жергілікті ат­қарушы және құқық қорғау органдарының араласуын сұрап, өз уәж­дерін жеткізді. Аудан тұрғындарын Маңғыстау облысы әкімінің орынбасары Руслан Сәкеев тыңдап, тиісті органдар бұл мәселемен айналысып жат­қандығын айтты. Ал Маңғыстау облысы прокурорының орынба­сары Ер­жан Тұрмағамбетов бол­са, бұл мә­селеден хабардар екенді­гін жә­не қа­зіргі таңда күдіктілер­дің ұс­та­лып, оларға қатысты тергеу амал­дары жүріп жатқандығын баян­­дады. Жаңа кеңсе облыс әкім­дігі­нің ғимаратында ор­на­лас­қан. Туындаған сұрақтар бо­йынша келесі нөмірлер­ге ха­бар­ласуға бо­лады 8 (7292) 30-12-82, 8 701 550 5109, электронды пошта: mng.project@mail.ru

Зухра ӘБДІЛ-САТТАР