Шаттық орнап көңілге...

Ел Тәуелсіздігінің 25 жылдығы аясында Қазақстан халқы Ассамблеясының облыстық хатшылығы, «Қоғамдық келісім» коммуналдық мемлекеттік мекемесі және «Жас қанат» жастар ұйымының ұйымдастыруымен «Нұр Плаза» теңіз жағалауында спорттық ойындар өтті. «Спорт-өмір көркі» деген атаумен өткен шараға «Алау», «Ботақан», «Шипагер» лагеріндегі балалар қатысты.

Жадыраған жазда балалар теңіз жағалауында әсем әннің толқуында би билеп, ән салды. Жүздері бал-бұл жайнаған жеткіншектер ұлттық спорт түрлерінен сынға түсіп, мәре-сәре болды. Балалардың бірқатары суға шомылып жатса, енді біреулері тоғызқұмалақ ойнап, асық атты.

– Үш ай бойы балалардың жазғы демалысының жақсы өтуіне жағдай жасау мақсатында спорттық, мәдени-танымдық шараларды өткізуді қолға алдық. Бүгін «Алау», «Ботақан», «Шипагер» лагерінен келген 400 бала әртүрлі шараларға қатысты. Тәуелсіздігіміздің 25 жылдығына орай ел рәміздерін құрметтеуге бағытталған сайыстар, Конституция күні қарсаңында этно-фэшн көрме, «Маңғыстау– достық мекені» фестивалін, ақ ниеттің, адалдықтың белгісі болып саналатын «Ақ орамал» акциясын және тағы да басқа бірлігімізді танытатын, ұлттық құндылықтарымызды қастерлеуге үндейтін шараларды өткізуді жоспарлап отырмыз,-деді «Қоғамдық келісім» КММ басшысы Амангүл Жайылханова.

Балалар арасында өткен тоғызқұмалақ ойынында Асыл Амантай топ жарса, Әсел Өтебаева 2-орынды, Асқарбек Тілепберген 3-орынды иеленді. Асық атуда Бейбарыс Елемес алғырлық танытып, 1-орынды қанжығалады. Балаларды мықтылыққа, мергендікке баулыған ойында Азамат Құдайбергенов пен Мерей Өтелген 2,3- орынды бөлісті. Барлық жеңімпаздарға ұйымдастырушылар атынан диплом табысталды.

Осылайша, болашақтың ертеңгі тұтқасын ұстайтын жас өскіндерге шат-шадыман күлкі сыйлаған шара соңында ұйымдастырушылар балаларға балмұздақ үлестірді.

Фарида МҰҢАЛҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.