Атақты скрипкашы Айман Мұсақожаева Маңғыстауда

Қазақстанның Халық әртісі, Еңбек Ері, Қазақ ұлттық өнер университетінің ректоры, скрипкашы Айман Мұсақожаева Маңғыстауға өнер сапарымен келді. Өнер иесі 25 адамнан құралған ұжыммен концерт қойып, түбек тұрғындарын классикалық әуенге бөледі.

«Біз «Рухани жаңғыру» бағдарламасы аясында еліміздің барлық өңірін концерпен араламақпыз. Ақтөбе, Атырау, міне Ақтау қаласы, жалпы батыс өңірлерін аралап келдік. Қазақ ұлттық өнер университетінің ұстаздары,  студенттері мен түлектерінен құралған «Солистер академиясы» мемлекеттік камералық оркестрімен, «Тарлан» этно-ансамблімен бірге концерт беріп келеміз. Олар кеште өздері жазған әуендерін де орындайды. Сондай-ақ бүгін ұсынатын шығармаларымыздың қатарында Вивальдидің «Жыл мезгілдері», Астор Пьицолланың «Буэнос-Айрестегі жыл мезгілдері», Дина Нұрпейісованың, Құрманғазының күйлері бар», - дейді өнер иесі.

Әлем сахналарында өнер көрсетіп, қазақ атын асқақтатып жүрген әртістің есімі «XX ғасырдың 2000 көрнектi музыканты» атты дүниежүзiлiк құрметтi тiзiмге енгiзiлiп, осы орталықтың медалiн омырауына таққан.

Әуезді кеште көрермендер республиканың үздік коллективі, камералық және симфониялық музыка орындау саласындағы еліміздің белгілі музыкалық бренді «Солистер академиясы» мемлекеттік оркестрінің өнерін де тамашалады.

Оркестр құрамында халықаралық конкурстардың лауреаттары, Қазақ ұлттық өнер университетінің ұстаздары мен студенттері ойнайды. Ұжым 20 жыл бойы түрлі халықаралық фестивальдерге қатысып, әлемнің бірнеше елін гастрольдік турмен аралаған. Олардың қатарында Италия, Испания, Германия, Түркия, Иордания, Ресей, Жапония, Оңтүстік Корея, АҚШ т.б. елдер бар.

Жаңа жылға орай оркестр Қазақстан мәдениетін таныстырмақ мақсатпен Италияға сапар шекпек. Ұжымның дирижері – «Дарын» мемлекеттік жастар сыйлығының иегері Асқар Дүйсембаев, көркемдік жетекшісі – ҚР Халық әртісі Айман Мұсақожаева.

Бұл – халық әртісінің Маңғыстауға екінші концерттік сапары. «Рухани жаңғыру» мемлекеттік бағдарламасы аясында ұйымдастырылған турне Астана қаласы мен Қазақ ұлттық өнер университетінің 20 жылдығына орайластырылған. Республика аумағын концерттік бағдарламамен аралауды жоспарлаған өнер ұжымы Маңғыстаудан кейін шетелге сапарлап, оралған соң елдегі турын жалғамақ.

Теңге БЕКМҰРЗАЕВА

Суретті түсірген Талант ҚҰСАЙЫН

[gallery td_select_gallery_slide="slide" ids="65785,65783,65782,65781,65780"] https://www.youtube.com/watch?v=Z6yrKHIoOn8 https://www.youtube.com/watch?v=eEwSO9XT56s