Ақтауда өтетін дзюдодан ашық Азия кубогіне 7 елден спортшы келді

3-4 қараша күндері Ақтау қаласында халықаралық дзюдо федерациясының күнтізбесіне сәйкес дзюдодан ерлер мен әйелдер арасында ашық Азия кубогы өтеді. Тұрар Жолдыбаевты еске алуға арналған турнирге Қазақстан, Өзбекстан, Моңғолия, Қырғызстан, Тәжікстан, Грекия және Грузиядан 100-ден астам дзюдошы қатысады, - деп хабарлайды mangystaumedia.kz сайты.

Осыған орай бүгін "Nur Plaza" қонақ үйінде команда жаттықтырушылары мен төрешілер алқасының кездесуі өтіп, жеребе тартылу рәсімі болып, сондай-ақ пресс-конференция өтті.

Конференцияға ҚР дзюдо федерациясының бас хатшысы Асхат Жіткеев, Азия дзюдо одағының спорт директоры Девит Картер, Маңғыстау дзюдо федерациясының президенті Асылбек Жолдыбаев, МО дене шынықтыру және спорт басқармасының басшысы Нұрбек Қарабалаев, ҚР дзюдо федерациясының рефери директоры Нұртазин Мухсин, сонымен қатар төрешілер қатысты.

Халықаралық дзюдо федерациясының ережесіне сай лицензиялық жарыс саналатын ашық Азия кубогының жеңімпаздары мен жүлдегерлеріне рейтингтік ұпайлар беріледі: 1 орын – 100 ұпай, 2  орын – 70 ұпай, 3 орын – 50 ұпай.

"Ақтау қаласы бұдан бұрын осы турнирді тоғыз рет өткізген. Биыл 10-шы рет ұйымдастырылып жатыр. Азия дзюдо федерациясына ұсыныс келіп түсті. Сол ұсынысты қабыл алып, Маңғыстау облысында өткізуге шешім қабылдадық. Турнирді өз күнтізбемізге енгіздік. Келер жылы дәл осы жарысты 2-3 қарашаға белгіледік. Турнирде олимпиадалық ұпайлар беріледі. Мұндай жарыс спортшылардың өсуіне көмектеседі. Өзіміздің өткен Рио олимпиадасына бір екі қызымыз 20-30 ұпай жетпей бара алмай қалған. Сол секілді бір-екі бала ұпайлары жетпей калды. Енді осындай жарыс ұпайды жинауға көмек береді деп ойлаймын. Өткен аптада өзіміздің балуандарымыз Абу Дабиде Гранслемде күресіп, 1,2,3 орындар алды. Қазір құрама команда жарыстан соң демалмай, Ташкентте өтетін жарысқа дайындығын пысықтап жатыр", - деді ҚР дзюдо федерациясының бас хатшысы Асхат Жіткеев.

Әлемнің түкпір-түкпірінен спорт саңлақтары келген жарысқа қала тұрғындарын тамашалауға шақырамыз. Келіп жерлестерімізге жанкүйер болыңыздар. Айта кетейік, турнир 33 шағынаудан, "Маңғыстау Арена" спорт кешенінде өтеді.

Екі күнге созылатын жарыстың кестесі мынадай: 3 қараша Ерлер: 60 кг, 66 кг, 73 кг Әйелдер: 48 кг, 52 кг, 57 кг, 63 кг Сағ 10:00-де  – жарыстың басталуы сағ 16:30-да  –жарыстың ресми ашылу салтанаты сағ 17:00-де –финалдық кезең 4 қараша Ерлер: 81 кг, 90 кг, 100 кг, +100 кг Әйелдер: 70 кг, 78 кг, +78 кг сағ 10:00 – жарыстың басталуы сағ 17:00 –финалдық кезең.

Асылзат ӨСЕРҚЫЗЫ