«Жетібай-Жаңаөзен» автожолы қайта жаңартыла бастады

Бүгін аймақ басшысы Ералы Тоғжанов «Жетібай-Жаңаөзен» автожолын қайта жаңарту жұмысына қатысты. Маңғыстау облысы әкімінің баспасөз қызметінің хабарлауынша, жолдың ұзындығы 73 шақырым. Жалпы құны 25 млрд теңгені құрайтын жобаға Азия Даму Банкі қаражат бөлуде. Жоба «Нұрлы жол» бағдарламасының аясындаіске асырылуда.

«Бүгін жалпыұлттық көпір аясында үлкен кәсіпорындар іске қосылды. Қазақстан бойынша 25 үлкен жобаның ішінде, өздеріңіз куә болғандай, «Шетпе - Жетібай - Ақтау» жолы бүгін Елбасыға тапсырылды. Сондықтан осы нысанның жүзеге асырылуына атсалысқан барлық азаматқа алғысымды айтамын. Міне, қазір сол ірі жобаның жалғасы ретінде Жетібай мен Жаңаөзеннің арасындағы жолдың бастамасын бастағалы тұрмыз. Бұл жәй ғана бастама емес, бұл, алдымен, адамдардың қауіпсіздігі. Қазір Ақтау мен Жетібай, Жетібай мен Шетпе арасындағы автожолда жол апаты бірнеше пайызға дейін төмендеген. Яғни жолдың сапасы халықтың өмірін қамтамасыз етумен тікелей байланысты. Екіншіден, жолдың бойында кәсіпкерлер кәсібін жүргізе алады. Үшіншіден, қаншама азамат жұмыспен қамтылды. Құрылыс жұмыстарына 600 адам тартылды. Қазақстанның тарихында алғаш рет Батыс Қытай мен Батыс Еуропа арасын жалғастыруға мүмкіндік туды. Елбасының үлкен бастамасының алғашқы сатысы жүзеге асты. Қазақстан - Еуразиялық көліктік-логистикалық хабқа айналатын күн алыс емес қой деп ойлаймын», - деді Ералы Тоғжанов.

Маңғыстау облысы әкімінің баспасөз қызметінің мәліметінше, 1-учаске бойынша жолдың 35 шақырымына дейін жөндеу жұмыстарын «Ақ жол құрылыс» ЖШС мен «Аккорд» АҚ жүргізеді, ал әрі қарай 2-учаске бойынша 73 шақырымға дейін «Дженгиз Иншаат» АФ АҚ жұмыс жасайды.

Камшат ОҢҒАЛТАЙ

Суреттерді түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.