Маңғыстаулық самбошы қыздар олжалы оралды

©

Алматы облысының Текелі қаласында самбо күресінен 23-жасқа дейінгі ерлер және қыздар арасында КСРО спорт шебері Қайрат Мирамбаевты еске алуға арналған ІV-ші ҚР чемпионаты өтті. Дүбірлі додаға еліміздің барлық аймағынан жиналған 146 самбошы қатысты.   

Олардың арасынан маңғыстаулық балуандар, облыстық «Жас батыр» мамандандырылған балалар мен жасөспірімдер спорт мектебінің шәкірті 48 келі салмақта Балнұр Аппазова алтыннан алқа тағып, ҚР чемпионы атанды. Одан бөлек Эльмира Хасан мен Гүлнұр Мақсетова үшінші орынға табан тіреп, қола медальдарды қанағат тұтты.

-Жарыс 1-3-і желтоқсан күндері Алматы облысында өтті. Жарысқа үш шәкіртімді апардым, үшеуі де жүлделі орындарды иеленді. Өте қуаныштымын. Шәкіртім 48 келі салмақта Балнұр Аппазова төрт кездесудің барлығын таза ұтып, финалдық белдесуде ОҚО балуаны ҚР чемпионы, Азия чемпионы Жадыра Пайыздан айласын асырып, өз салмағында жеңімпаз атанды. «Самбо күресінен ҚР спорт шебері» атағын абыроймен қорғады. Сонымен қатар 60 келі салмақта белдескен Эльмира Хасан төрт белдесу өткізіп, жартылай финалда ОҚО балуанына есе жіберіп, қола медальді еншіледі. Және +80 келі салмақта Гүлнұр Мақсетова үш белдесу өткізіп, жартылай финалда жамбылдық балуаннан ұтылып қалып, қола медальға қол жеткізді,-дейді балуандарды жарысқа дайындаған белгілі бапкер Берік Жұмағалиев.

         Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.