Ақтаудағы 2017 жылдың ұрпақтарына арналған капсула 1 желтоқсанда ашылады
[ 2017 ] 4 қараша, 15:23 | Жаңалықтар
Бұл туралы Ақтау қаласы әкімдігінде өткен брифингте айтылды. Жиынды Ақтау қалалық мәдениет және тілдерді дамыту бөлімінің бастығы Гүлжазира Алдашева, облыстық ардагерлер кеңесінің төрағасы Серікбай Төлетов және ардагер журналист Петр Долматов өткізді.
"Маңғышлақты игерушілерден 2017 жылдың ұрпақтарына" капсуласын ашу үшін арнайы ұйымдастыру комитеті құрылған. Оның құрамында қала әкімінің міндетін атқарушы Н. Аққұлов, қалалық мәслихат хатшысы М. Молдағұлов, "Қазақстан коммунистік халық партиясы" МОФ хатшысы Р. Махамбетова, ардагер журналист П.Долматов, облыстық ардагерлер кеңесінің төрағасы С. Төлетов және капсула салу рәсімінің қатысушылары бар. Ұйымдастыру алқасы өзара ақылдаса келе, 1967 жылғы ұрпақтың 2017 жылы ұрпаққа аманаттап қалдырған жолдауын Қазақстан Республикасының тұңғыш президенті күні - 1 желтоқсанда ашу туралы шешімге келген.
- 7 қараша сол кезеңнің басты мерекесі болғанымен, қазір бұл күн - жай ғана жұмыс күні. Ал, Қазақстан Республикасының тұңғыш президенті күні - тәуелсіз Қазақстан үшін айтулы мереке. Бұл күн демалыс болғандықтан, шараға қала халқы мен қонақтары келіп қатыса алады, - деп түсіндірді Петр Долматов.
Ақтау қалалық мәдениет және тілдерді дамыту бөлімінің бастығы Гүлжазира Алдашеваның айтуынша, 1 желтоқсан күні "Ақбота" паркінен капсула жасырылған стеллаға дейін ХХ ғасырдың пионерлері - сол шараның куәгерлері мен ХХІ ғасырдың Жас ұландарының мерекелік шеруі өтеді. Бұл ұрпақтар сабақтастығын білдіреді. Капсуланы сол жылдардың жастары алып бүгінгі жастарға тапсырады. Капсуланы ашып оқыған соң үш ұрпақтың (ХХ ғасыр пионерлері, қазіргі ұрпақ пен жас ұландықтар) өкілдері сөз сөйлейді.
- Біз капсуланы тек ашып оқып қана қоймай, оны әрі қарай жалғастырғымыз келеді. Сөйтіп, қала тарихында жақсы дәстүр, әдемі үрдіске негіз салғымыз келеді, - дейді Гүлжазира Тасеменқызы.
Осылайша "Мәңгілік ел тұрғындарына жолдау" қалдырылмақ. Ол 2050 жылдың ұрпақтарына арналады. Мерекелік шара Астана алаңында жалғасып, Тұңғыш Президент күніне орай концерт өтеді.
Камшат ОҢҒАЛТАЙ
Суреттерді түсірген Талант ҚҰСАЙЫН
[gallery td_select_gallery_slide="slide" ids="40982,40984,40985"]
1234
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
