Корейлердің Қазақстанға қоныстанғанына 80 жыл толды

​Қазақстандағы корей ұлтының 80 жылдығы және облыстық этномәдени бірлестігінің құрылғанына 25 жыл толды. Осыған байланысты Н.Жантөрин атындағы музыкалық-драма театрында салтанатты кеш өтті.

​1937 жылдары 100 мыңдай қиыр шығыс кәрістері еліміздің әр аймағына жер аударылды. Жолдан әбден қажып, қалжыраған корей ұлтын қазақтар болмысына сай құшағын айқара ашып, емін-жарқын көңіл күймен қарсы алды.

1989 жылы Ақтау қаласында кәріс ұлттық мәдени орталығы құрылған болатын. Содан бері өз жұмысын тоқтатпаған этномәдени бірлестік қазіргі күні облысымыздың барлық шараларында белсенділігін көрсетіп жүр.

Мерекелік жиынға Қазақстандағы корейлер ассоциациясының өкілдері, облыстық этномәдени бірлестік ұжымы, облыс әкімі Ералы Тоғжанов және қала тұрғындары қатысты.

– Біз бүгін Ақтау қаласында айтулы мейрамды атап өтіп отырмыз. Бұл – корейлердің Қазақстанды мекен еткеніне 80 жыл толуы. Әрине, ата-бабаларымыз қиын кезді, ауыр сәтті бастан өткерді. Бірақ қазір қазақ жеріне орнығып, халықтың бір бөлігіне айналды. Бүгінгі шараға еліміздің түкпір-түкпірінен, Алматыдан, елшіліктен көптеген делегация қатысып отыр. Қазақстандағы Корей ассоциациасының жұмыс істеп келе жатқанына 27 жыл болды. Еліміздің әр өңірінде біздің 18 өкілдігіміз бар. Ата-балаларымызға, оларға қиын-қыстау заманда демеу болған қазақ халқына үлкен алғыс. Біз оны ұмытпауымыз, әрқашан құрметтеуіміз керек, – дейді Қазақстандағы корейлер ассоциациясының  президенті Сергей Огай.

Шара барысында жергілікті суретшілердің жұмыстарынан жасақталған және ЭМБ-дің қолданбалы шығармашылық көрмесі ұйымдастырылды.

​Қаншама қайғы-қасірет пен қуғын-сүргінді басынан өткерген қазақ халқы тағдырлас корей халқының жан батпанын тереңінен түсініп, бауырына басты. Бүгінде облысымызда 800-ден астам кәріс ұлтының өкілі тату-тәтті өмір сүріп жатыр. Бұл – екі елдің өзара ынтымақтастығы мен бірлігінің белгісі.

Оқи отырыңыз: Сайын ауылында қос қария вагонда тұрып жатыр

- Қазақ ең қиын кезеңдерде басқа ұлттардың басына түскен ауртпалықты бірге бөлісті, бірге көтерді. Ешкімнің кеудесінен итерген жоқ. Соңғы асын да бөле жеді. 62 ұлттың өкілі 1937 жылдан бастап 1949 жылға дейін Қазақстанға жер аударылған болатын. Соның бірі – 80 жылдығын тойлап отырған кәріс ұлтының өкілдері. Корей халқы еңбекқор, жауапкершілігі өте жоғары екенін білеміз. Сондықтан «жер аударылғандарына» емес, «бірге тұрып жатқанымызға» 80 жыл деп айтуымыз қажет, – деді Маңғыстау облысының әкімі Ералы Тоғжанов.

Салтанатты кеште этномәдени бірлестіктің, корей ассоциациясының бірқатар өкілдері марапатқа ие болды.

Теңге БЕКМҰРЗАЕВА

Суреттерді түсірген Талант ҚҰСАЙЫН

[gallery td_select_gallery_slide="slide" ids="38566,38568,38569,38570,38571,38574,38573,38567"]