"Қарттар үйінде" қайырымдылық акция өтті

©

Қарттар күні қарсаңында «2 Арнаулы әлеуметтік қызметтер көрсету орталығы» мемлекеттік коммуналдық мекемесінде қайырымдылық акциясы өтті.

ҚР Мемлекеттік қызмет істері және сыйбайлас жемқорлыққа қарсы іс-қимыл агенттігі Маңғыстау облысы бойынша департаментінің ұйымдастырған акцияға мемлекеттік органдар басшылары, үкіметтік емес ұйымдардың, этномәдени және діни бірлестік өкілдері қатысты.

Облыстағы барлық мемлекеттік органдар акция шеңберінде тағдыр тәлкегімен арнаулы әлеуметтік орталықтың тұрақты тұрғыны болған қарияларға қамқорлық танытып, көмек көрсетеді.

- Елбасының «Рухани жаңғыру» бағдарламасы аясында бірнеше шаралар ұйымдастырылып жатыр. Біз, мемлекеттік қызметкерлер, олардан қалыс қалмауымыз қажет. Рухани жаңғыру ата дәстүрге негізделген. Ол үлкенге құрмет, кішіге ізет көрсетумен тығыз байланысты. Сондықтан облыстағы мемлекеттік органдар қызметкерлері, қоғамдық емес ұйымдар өкілдері, облыстық мәслихат депутаттарымен бірлесіп, бүгінгі шараны ұйымдастырып отырмыз. Мұнымен тоқтап қалмай, тағдырдың тәлкегіне ұшырап, қарттар үйінде тұрып жатқан ақсақалдар мен аналарымызға қамқорлық жасауды дәстүрге айналдырғымыз келеді. Тұрақты түрде жағдайларын біліп, жанына келіп әңгімесін тыңдап, бірге уақыт өткізуге тырысамыз, - дейді ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Маңғыстау облысы бойынша департаментінің басшысы Нұргүл Жанназарова.

Шара аясында орталықтың қызмет алушысы Нұржан Аққали қарттар атынан сөз сөйлеп, ұйымдастырушыларға алғысын білдірді.

- Құрметті ата-әжелер, замандастар. Сіздерді мерекемен құттықтауға рұқсат етіңіздер. Осындай мереке ұйымдастырып, қолдау білдіріп жатқан барша мемлекеттік қызметкерлерге рақметімізді айтамыз. Дендеріңіз сау болсын, еңбектеріңіз өнімді, жемісті болсын. Егеменді қазақ еліне абыройлы қызмет ете берулеріңізге тілектестігімізді білдіреміз, - деді ол.

Акция барысында «Қарттар үйінің» тұрғындарына медициналық қарау жүргізіліп, өлкемізге белгілі өнер жұлдыздарының концертіне жалғасты.

Теңге БЕКМҰРЗАЕВА

Суреттерді түсірген Талант ҚҰСАЙЫН

[gallery td_select_gallery_slide="slide" ids="37531,37532,37533,37534,37535,37536,37537,37538,37539,37540,37541,37542,37543,37544,37545"]