Ақтауда Абай өлеңдері оқылып, әндері шырқалды

©

Ұстаздар мерекесі қарсаңында облысымызда «Абай рухымен бір тәулік» атты танымдық-шығармашылық кеш өтті. Оған облыстық білім беру ұйымдары өкілдері, оқушылар, студенттер қатысты. Шара ұйымдастырушылары – Маңғыстау облысы білім басқармасы мен «Абай әлеміне саяхат» клубы.

- Маңғыстау облысының білім беру ұйымдарында белгілі ақын, жазушы, драматург, сәулетші Сайын Назарбековтың бастамасымен жүргізіліп отырған «Абай әлеміне саяхат» танымдық  клубының орны ерекше. Ұлы Абайдың шығармашылық мұрасы халқымыздың ғасырлар бойы маңызын жоймайтын рухани қазынасы. Ал өскелең ұрпаққа ұлы оның дара жолын, шығармашылығын дәріптеуде бүгінгі «Абай рухымен бір тәулік» танымдық шарасының берері көп. Абай мұраларын түсіндіру арқылы адамгершілік құндылықтарды насихаттау, ұрпағымыздың санасын жат пиғылдан, үгіттен сақтау, оларды Абай сөздері, Елбасы ойлары арқылы рухтандыру – басты ұстаным. Әрбір қазақ баласы Абай шығармаларымен сусындап өссе, қазақ халқының бірегейлігін мәңгі сақтайтынына, патриот ұрпақтың қалыптасарына сенімдіміз. Шараға қатысушыларға сәттілік тілеймін, - деді жиын басында  сөз алған Маңғыстау облысы әкімінің орынбасары Руслан Сакеев.

«Абай әлеміне саяхат» клубы туралы ойларын қағазға түсіру жұмыстарын клуб президенті Сайын Назарбекұлы 2016 жылдың қаңтар айында бастап, наурызда Мұнайлы ауданының №10 мектебінегі кездесуде осу клуб туралы айтып, ашуға келіседі. Сол жылы мамыр айында «Абай әлеміне саяхат» клубының тұсауы кесіледі.

Бұл бастаманы қолдаған білім басқармасы клубты облыстың барлық 134 мектебінде ашу жұмыстарын қарастырады. Содан бастап оқушылар бірте-бірте клуб мүшелігіне тартылып, Абай тынысымен тыныстай бастайды.

- Санамда жас ұрпақ тәрбиелеп жатқан ұстаздар, солардан тәлім алып жүрген жастардың болашағы. Солардың толық адам дәрежесіне жетуі жолында бір кірпіш боп қалануды мақсат етіп жүрген адаммын. Осы жиынның қорытындысында жастарымыздың Абайға деген сүйіспеншілігі артып, бүгіннен бастап Абай әлемінің есігін қаға бастайды деп сенемін, - деді жазушы, драматург Сайын Назарбеков.

Кеште Абай әндері орындалып, өлеңдері мен қара сөздерінен үзінді оқылды. «Абай рухымен бір тәулік» шарасы аясында қатысушылар мен көрермендер рухани азық алып, әдемі көңіл күймен тарқасты.

Теңге БЕКМҰРЗАЕВА

Суреттерді түсірген  Талант ҚҰСАЙЫН

[gallery td_select_gallery_slide="slide" ids="37597,37594,37593,37592,37595"]