Маңғыстауда темірбетон өнімдерін шығаратын зауыт іске қосылды

©

Конституция күніне орай және индустриалды-инновациялық даму мемлекеттік бағдарламасын жүзеге асыру аясында аймақта темірбетон өнімдерін шығаратын зауыт жұмысын бастады. «Ақтау теңіз порты»  арнайы экономикалық аймағында іске қосылған зауыттың салтанатты ашылуына облыс әкімі Ералы Тоғжанов арнайы қатысты.

-Маусым айында басталған жоба өз жемісін беріп, бүгін толықтай іске қосылып отыр. Жобаны уәде берілген уақытында іске қосып отырған азаматтарға алғыс айтамын. Бұл жоба өңірде жұмыссыздықпен күресуде де өз септігін тигізбек. Темірбетон өнімдерін шығаратын зауыт облысымызға ең керекті жобалардың бірі. Сондықтан да мекеме ұжымына толағай табыс тілеймін,-деді өңір басшысы Ералы Тоғжанов.

QSM корпорация басқармасы төрағасының орынбасары Ғалымжан Оспанқұловтың айтуынша, жобаны жүзеге асыру үшін 800 млн.теңге қаржы қарастырылған.

-Зауыттың жалпы аумағы 6 гектар жерді алып жатыр. Зауыт 17 түрлі өнім өндіреді. Жобаның қуаты тәулігіне 1200 текше метр темірбетон өнімдерін шығаратын болады. Негізгі шикізат біздің аймақта бар. Олар: қиыршықтас, құм, цемент және арматуралар. Алғашқы кезеңдерде өнімдерімізбен Маңғыстау облысын қамтитын болсақ, алдағы уақытта көршілес облыстармен де тығыз жұмыс жасайтын боламыз. Жылдық тауар айналымды 7 млрд.теңгеге жоспарлап отырмыз. Компанияның бәсекелестерінен артықшылығы темірбетон жасау үшін жаңа технологияны қолдану болып табылады. Және бұл темірбетон құнын айтарлықтай төмендетеді,-деген Ғалымжан Оспанқұлов, зауыт жергілікті 200 адамды тұрақты жұмыспен қамтуды жоспарлап отырғанын айтты.

Жалпы бүгінгі таңда «Ақтау теңіз порты» арнайы экономикалық аймағында 35 инвестициялық жоба жүзеге асырылуда. Оның ішінде 17 жоба іске қосылып, 1147 адам тұрақты жұмыспен қамтылған. Екі жоба жыл аяғына дейін жүзеге аспақ.

Венера МИРЛАН Суреттерді түсірген Серік МАЙЕМЕРОВ

[gallery td_select_gallery_slide="slide" ids="33869,33867,33866,33863,33862,33859"]