782 805 теңге көлеміндегі айыппұл мемлекет пайдасына өндірілген

ҚР мемлекеттік қызмет істері және сыбайлас жемқорлыққа қарсы іс-қимыл агенттінінің Маңғыстау облысы бойынша департаменті биылғы жартыжылдықты қорытындылап, департаменттің атқарған қызметтерін саралады.

Биыл департаментке көрсетілетін қызметтер сапасына байланысты 19 өтініш түскен. Оның ішінде 11 өтініш қаралып, қалған 8 өтініш құзырлы органдарға жолданған. Есепті кезеңде бұл бағытта барлығы 24 тексеру жүргізілген. Тексеру нәтижесімен 86 мыңнан астам кемшіліктер анықталған. Ең көп орын алатын кемшіліктер бұл-стандартпен айқындалмаған құжаттарды сұрату, көрсетілетін қызметтердің тәртібін бұзу, мемлекеттік көрсетілетін қызметтердің мерзімін бұзу бағыттарында болған.

-Департаментпен 55 ұсыныс жолданып, 18 лауазымды тұлға тәртіптік жауапкершіліктерге тартылды. Сонымен бірге, тексерулер кезінде ҚР «Рұқсаттар және хабарламалар туралы» Заңының 465 бабының 1,2 бөліктерімен 15 әкімшілік хаттама толтырылып, 782 805 теңге көлемінде айыппұл  мемлекет пайдасына өндірілді. Айта кететін жәйт, әкімшілік жауапкершілікке тартылған лауазымды адамдар бұл жергілікті мемлекеттік органдардың  бірінші басшылары,-дейді ҚР мемлекеттік қызмет істері және сыбайлас жемқорлыққа қарсы іс-қимыл агенттінінің Маңғыстау облысы бойынша департамент басшысының міндетін атқарушы Ерлеген Мендалиев.

Бұдан басқа, «Азаматтық құқық» жекеменшік мекемесінің өкілдері аумақтық департамент қызметкерлерімен  бірлесіп, «Құпия сатып алушы» жобасы шеңберінде 23 іс-шара өткізген. Нәтижесінде бірқатар қызмет беруші мекемелердің тарапынан қателіктер мен кедергілердің орын алатындығы анықталған. Кейбір жағдайларда заңсыз сыйақы сұрау деректері де кездескен. Мәселен, №1 Ақтау қалалық емханасының бірнеше қызметкері №0-86/у нысанды медициналық тексеруден өткендігі туралы анықтаманы 3000 теңгеге 10 минуттың ішінде жасай алатындарын қызмет алушыларға ашық айтқан. Аталған деректер бойынша облыстық денсаулық сақтау басқармасына ұсыныс жолданып, заңға қайшы келетін іс-әрекеттер жасағаны үшін аталған емханасының 3 қызметкері жұмыстан шығарылған.

-Бұдан басқа басқармамен 7 ішінара тексеру жұмыстары жүргізіліп, 130 заңбұзушылықтар анықталды. Мемлекеттік орган басшыларына 6 ұсыныс жолданып, 110 бұзушылық қалпына келтірілді. Мысалы, Құрық  ауылы  әкімінің  м.а. ақпан  айында қарамағындағы бір бас маманды, жұмыста себепсіз болмады деген желеумен атқаратын  лауазымынан  босатып жіберген. Осыған  ұқсас  жағдай,  Қарақия  аудандық сәулет және қала құрылысы  бөлімінің  басшысы  тарапынан да  орын  алған. Бұл жағдайда бөлім басшысы өзінің қарамағындағы  бас маманды тексеруші  органның  ұсынысы  негізінде мемлекеттік қызметке кір келтіретін  теріс  қылық  жасағаны  үшін  лауазымынан  босатқан. Жалпы жыл басынан бері конкурс өткізу тәртібін бұзғаны және  заңсыз қызметтен босатқаны үшін лауазымды тұлғаларға 6 хаттама толтырылып, барлығы 500 мың теңгеден астам айыппұлдар салынды,-дейді департамент басшысының міндетін атқарушы Ерлеген Мендалиев.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.