«Нұр Отанда» ардагерлер кеңесі құрылды
[ 2017 ] 22 маусым, 05:06 | Жаңалықтар
«Нұр Отан» партиясы Маңғыстау облыстық филиалы жанынан Партия ардагерлерінің кеңесі құрылды. Жаңа кеңестің құрамына 11 мүше енді. Төрағасы болып облыстық қоғамдық кеңестің мүшесі, өңірдің құрметті азаматы, партия ардагері Қайролла Ережепов тағайындалды.
«Нұр Отан» партиясы облыстық филиалында бірнеше жыл бұрын жастарға қолдау көрсететін республикалық деңгейдегі «Жас Отан» жастар қанаты құрылған болса, енді ардагерлерден құралған кеңес өз жұмысын бастамақ. Және бұл партия ардагерлерінің кеңесі республикадағы ең алғашқысы болып табылмақ. Өлкенің маңдайалды азаматтары енген кеңес мүшелері мәдениет, дін, бірлік тақырыбындағы мәселелерге назар аударып, қоғамның өркендеуіне өз үндерін қоспақ.
Партия ардагерлерінің кеңесін құру жөніндегі отырыста «Нұр Отан» партиясы облыстық филиалының төрағасы, облыс әкімі Ералы Тоғжанов жаңа кеңестің міндеттеріне тоқталды. Оның сөзінше, кеңес құрамындағы аймақтың қоғамдық-саяси өміріне белсенді араласып, дамуына үлес қосып жүрген ардагерлердің өмір және еңбектегі бай тәжірибесі Елбасы жолдауын жүзеге асыруға септеседі. Аудандағы өзекті мәселелерді қарастыру, халықпен етене жұмыс істеу, медиация тәсілін қолдану арқылы мәселелерді сотқа дейін жеткізбей шешу, руханият, мәдениет мәселелеріне айрықша мән беріп, тарихи мұраларды көздің қарашығындай сақтауға үлес қосу – партия ардагерлер кеңесінің міндеттерінің бір парасы ғана. Аймақ басшысы кеңес мүшелеріне ел ішіндегі мамыржай тыныштықты, бейбіт өмірді сақтауға, жастар жүрегіне игі қасиеттерді ұялатып, рухани өсуіне жәрдемдесетініне үлкен сенім білдіріп, келешек ілкімді істеріне сәттілік, табыс тіледі.
Отырыста кеңеске басшылық ететін азаматтар сайланды. Төрағасы – Қайролла Ережепов сайланса, оның орынбасары қызметіне облыстың құрметті азаматы, партия ардагері Сақып Керелбаев тағайындалды. Ал кеңестің хатшылығы «Нұр Отан» партиясы облыстық филиалының кеңесшісі Есберген Іңірбайұлы болды. «Нұр Отан» партиясы облыстық филиалының бірінші орынбасары Нұри Тумышев жаңа кеңестің төрағасы мен орынбасарына жұмыстарына сәттілік тілей отырып, қызметтік куәліктерін тапсырды.
Ханым ҚУАТ
Суреттерді түсірген Серік МАЙЕМЕРОВ
1022
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
