Интерактивті дәріс өтті
[ 2017 ] 4 мамыр, 14:41 | Жаңалықтар
Қазақстан Қарулы Күштерінің 25 жылдығына орай интерактивті дәріс өтті. Ауқымды іс-шараға Маңғыстау облысы бойынша әскери-патриоттық клубтар мен үйірмелер шәкірттері және әскери қызметшілер қатысып, онлайн жүйеде дәріс тыңдады.
Ғаламтор желісі арқылы Қорғаныс министрінің орынбасары генерал-майор Талғат Мұхтаров, Әуе қорғанысы күштері бас қолбасшысының тәрбие және идеологиялық жұмыс жөніндегі орынбасары генерал-майор Қайрат Садықов сынды жоғары шенді әскерилер тағылымды әңгіме өрбітті. Мәселен Қайрат Садықов қазақ әскерінің күш-қуаты, тарихы мен жетістіктері, жаңа әскери техника турасында баяндады. Қарулы Күштер айбынын танытар аса оңтайлы, кәсіби әрі жоғарытехнологиялы әскери жабдықтармен жасақталған Әуе қорғаныс күштеріне баса назар аударды. Сонымен қатар, Талғат Мұхтаров Елбасы қолдауы әрі салиқалы саясаты аясында еліміздің әскери базасы жыл сайын жаңа әрі заман талабына сай қорғанысы берік, жоғары сапалы қару-жарақ әрі әскери техникамен толықтырылып отыратындығын мәлімдеді. Мәселен, биыл ҚР Қарулы Күштерінің тарихында алғаш рет заманауи әскери СУ-30М тікұшағы қолданысқа берілген. Ескере кетер жайт, бүгінгі таңда бұл әлемдегі ең үздік көпфункционалды тікұшақ ретінде танымал. Сонымен қатар онлайн-дәріс барысында ұлттық қауіпсіздікті нығайту, сыртқы сын-қатерлер мен халықаралық терроризмге тосқауыл қою, әскери салада халықаралық әріптестік әлеуетін көтеру мәселелері сөз болды.
«Республикалық іс-шара әскери-патриоттық тәрбиеге арналған. Еліміздің бүкіл аумақ қатысты. Біздің өңірден әскери-патриоттық клубтар мүшелері қатысып отыр. Себебі бұл шара ең алдымен жас әскерилерге арналады»,-дейді Маңғыстау облыстық қорғаныс істері жөніндегі департамент басшысының орынбасары Сейілжан Бекмұратов.
Әскери-патриоттық үйірмелер мен клуб мүшелері онлайн-дәрісті ынта-ықыласымен тыңдады.
«Жалпы біз көптеген іс-шараларға қатысамыз. Әскери дайындық жаттығулары біз үшін өте пайдалы. Бұндай шаралар әскерге баруға құштарлығымызды оятады. Өте қуаныштымын. Тәрбиелік мәні зор басқосулар жиі өткізілсе дейміз»,-дейді «Жас теңізші» клубының мүшесі Арман Назарбаев.
Голрох ЖЕМЕНЕЙ
Суреттерді түсірген Серік МАЙЕМЕРОВ
1117
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
