Қашаған шығармашылығына арналды

Заманында әлеуметтік мәселелерді көп қозғап, өз кезеңінің белді ақындарының бірі болған жыраулардың бірі—Қашаған Күржіманұлы. Таяуда өлеңдерінде надан, дінбұзар, дүмше молдалар мен сараң байларды аяусыз әшкерелеп, адамгершілік, ізгілік қасиеттерді дәріптеген, елдік пен ерлікті, халық мұратын жырлаған кең тынысты осынау ақынның шығармашылығына арналған шара өтті.

«Каспий өңірі «Болашақ» колледжінде» ұйымдастырылған «Қашаған Күржіманұлы- қазақ жырының кәусар бұлағы» атты студенттер арасындағы облыстық ғылыми-тәжірибелік конференцияға өңіріміздің орта арнаулы оқу орындарында оқитын жастар қатысты. Оны «Каспий өңірі «Болашақ» колледжінің» директоры Әсел Қаламқалиева ашып, конференция ұлттың рухани келбетін, халықтың мінезін айшықтайтын киелі сөз иесі Қашаған Күржіманұлының шығармашылық мұраларын насихаттау мақсатында ұйымдастырылғанын атап өтті.

«Өрлеу» біліктілікті арттыру институтының кафедра аға оқытушысы, профессоры Қ.Асанова мен Ж.Дүйсенбаева «Қашаған ақын өлеңдерін жаңа технология бойынша оқытудың әдіс-тәсілдері» тақырыбында дамыта оқыту технологиясы бойынша 8 қадамнан тұратын әдіс-тәсілдерін пленарлық отырыста көрсетіп өтті.

Студенттер арасында ұйымдастырылған конференция аясында «Қашаған мұралары— рухани құндылық көзі» және «Тіл. Әдебиет. Тәрбие» бағытындағы екі секция жұмыс жасады. Оған облыстағы колледждерден қырықтан астам студенттер қатысып, ғылыми жұмыстарын ұсынды. Барлық қатысушылар сертификат иеленді. Секция жұмысының қорытындысы бойынша ғылыми жұмыстары үздік деп танылған студенттер Ж.Өтелгенова, Т.Сарман, А.Теміралиев, С.Ақберген, С.Жайлаубаев, А.Оңайбаева Алғыс хаттармен марапатталса, К.Жақсым, Н.Көпберген, А.Демекова, М.Ізтұрлиева, Ф.Ізбасарова, А.Мұратқызы, Х.Қарасаева, А.Қуанышқызы Дипломдармен марапатталды.

Валентина ҚОЗЫБАҚОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.