Жаңа кезең зор жауапкершілік жүктейді

Елімізде ҚР Парламенті Мәжілісі мен барлық деңгейдегі мәслихаттар депутаттарын сайлау науқаны басталып кетті. Аймағымыз бойынша барлығы 115 депутат, оның ішінде облыстық мәслихатқа 25 депутат сайланады. Осы жылдың 1-4 ақпаны аралығында праймериздерде «Нұр Отан» партиясы атынан өңіріміздің мәслихаты депутаттығына 25 кандидат өткен. Бұл туралы Ш.Есенов атындағы Каспий мемлекеттік технологиялар және инжиниринг университетінде өткен партияның облыстық филиалының кезектен тыс ХХІV конференциясында айтылды. 

Алқалы жиынға облыс әкімі Алик Айдарбаев, облыстық басқармалар мен департаменттер басшылары, аудан-қала әкімдері, партия белсенділері мен жастар қатысты. Кезектен тыс өткізілген басқосуға партияның аумақтық филиалдарынан 270 деле­гат шақырылған. Өңір басшысы 2016 жылдың 29 қаңтарындағы «Нұр Отан» партиясының ХVІІ съезінде қабылданған «Қазақстан – 2021: Бірлік. Тұрақтылық. Жасампаздық» сайлауалды бағдарламасының маңыздылығы туралы сөз алды.

– Жаңа бағдарлама – «Нұр Отан» партиясының алдағы бесжылдыққа арналған жұмыс жоспары болып табылады. Елбасымыз қазақстандықтардың алдына жаңа міндеттер мен мақсаттар қойып отыр. Партия төрағасы Нұрсұлтан Назарбаев 2015 жылдың 30 қарашасындағы өз Жолдауында елімізді жаһанды жайлаған дағдарыстардан алып өтудің, реформа­лар арқылы өсудің және дамудың нақты жолдарын көрсетіп берген болатын. Ұлт жоспары да осы бағыттағы жұмыстарды күшейтуді көздейді. Жаңа кезеңнің міндет­терін орындау үшін елімізге жаңа өкілетті органның қажеттілігі күн өткен сайын сезілуде. Бұл міндеттер ел азаматтарына үлкен жауапкершілік жүктейді,-деді облыс әкімі А.Айдарбаев.

Әлем мемлекеттері қатарында Қазақстан үшін қиын да маңызды тұста қабылданған жаңа құжат партияның бұдан бұрын басшылыққа алған сайлауалды тұғырнама көрсеткіштері бойын­ша жеткен жетістіктері және бағдарлама жүктеген міндеттерді сараптайды. Партияның жаңа бағдарламасында денсаулық сақтау, білім беру салаларын дамыта оты­рып, әлемдік стандарттарға қол жеткізу көзделген. Облысымызда өткен бес жыл ішінде 17 жаңа мек­теп салынып, үш ауысымды және апатты жағдайдағы мектептер жойылды.

– «Нұр Отан» 17 жылдан бері билік партиясы ретінде елдің жарқын болашағы жолындағы жа­уапкершілік жүгін өзіне артқан жалпыұлттық жасампаз күш екенін нақты істерімен дәлелдеп келеді. Сайлауалды бағдарламада жаңа экономикалық саясат­ты жүзеге асырудың барлық тетіктері көрсетілген. Мұның басым бағыттары ел ішіндегі инфрақұрылымдарды дамытудың «Нұрлы жол» мемлекеттік бағдарламасында анық көрсетіліп, қазір жүзеге асырыла бастады.

«Нұрлы жол» бойын­ша 14 инфрақұрылымдық және индустриялық жобалар жүзеге асы­рылып, 159 млрд.теңге игерілді. Алдағы бесжылдықта кәсіпкерлікті дамыту ісіне айрықша басымдық бере отырып, инвестициялық ахуалды жақсарту үшін барлық жобалар өңірлік бағдарламаларға берілмек. 2017 жылдан бастап инвестициялық жобаларды қаржыандыру толықтай жергілікті деңгейге берілетін болады. Ел тұрғындарының әлеуметтік жағдайын жақсарту бағдарламадан тыс қалмаған, бұл салаға да үлкен мән беріліп отыр,-дейді «Нұр Отан» партиясы облыстық филиалы төрағасының бірінші орынбасары Х.Нұрғалиева.

Нұротандықтардың жаңа бағдарламасы бойынша алдағы 5 жылда елімізде өмір сүрудің жаңа сапасына көшіру, жастарды кәсіпкерлікке баулу, бәсекеге қабілетті мамандарды даярлау басты на­зарда болмақ. Аграрлық саланы дамыту мақсатында өңірімізде ауыл кәсіпкерлеріне қолдау күшейтілетін болады. Жиын барысында жарыссөзге шыққан партия мүшелері құжаттың маңыздылығына тоқталып, 17 жылдық тари­хы бар «Нұр Отанның» көшбасшылығын атап өтті.

– Мен Жармыш ауылында тұрамын. Ауылдықтардың өмірінің жақсаруына партиямыздың қолдау көрсетіп, тұрғындарға қамқорлық та­нытып келе жатқаны рас. Соңғы жылдары Жармыш­та дәрігерлік амбулатория мен балабақша салынып, орта мектеп жөндеуден өткізілді. Кәсіпкерлік дамып, ауылда 13 дүкен ашылды. Қазір әлеуметтік сала қызметкерлеріне арналған 4 пәтерлік тұрғын үй құрылысы жүргізілуде. «Нұр Отан» тұрғындардың өміріндегі өзекті мәселелерді шешуге араласып тұрады. Осындай игі істердің нәтижесінде былтыр «Үздік бас­тауыш партия ұйымы» атандық. Біз, жастар, әрқашан ауылды өркендетуге белсене араласуға дайынбыз!-деді Жармыш баста­уыш партия ұйымының төрағасы М.Оразалиев.

– Өкінішке орай, қазіргі уақытта әлемде экономикалық дағдарыс қана емес, түрлі келеңсіз жағдайлар, оқыс оқиғалар орын алуда. Осындай жаһандық жағдайда Ел­басымыз көрегенді саясат ұстанып отыр. Елімізде кәсіпкерлік пен биз­несті дамытуға зор мүмкіншіліктер бар. Нұрсұлтан Назарбаев мемлекет алдындағы мәселелерді айтып қана қоймай, оларды шешу жолдарын анықтап берді,-деді «Б-групп опе­рейтинг» ЖШС-і директорының орынбасары А. Кетебаев.

Осындай жарыса айтылған жарыссөздерден соң, облыс әкімі Алик Серікұлы партия атынан мәслихат депутаттығына үміткерлер ірік­теліп, 25 кандидаттың таңдалып алынғанын айтты. 17 жылдан бері көшбасшылықтан еш айырылмаған «Нұр Отанның» бұл мүшелері облыстық мәслихаттың депутаты атанудан үміткер. Олардың ішін­де бұрынғы халық қалаулылары және жаңа тұлғалар, «ҚазАзот» ЖШС-і Шағырлы-Шөмішті филиалының директоры Абзал Меңдібайұлы, «Ақтау» сауда, ойын-сауық кешенінің директоры Ахмет Салманов, «Forte Bank» АҚ Ақтау филиалының директоры Аббат Өрісбаев және «Каспий Құрылыс Сервис» ЖШС-і басқарма төрағасы Самат Базарбаев бар. Әріптестер кандидаттарға алдағы сайлауда ба­сым дауысқа ие болуларын тілесе, аймақ басшысы ел үшін маңызды науқанға ыждағаттылықпен дайындалып, ұйымшылдықтың үлгісін көрсетуге шақырды. Жаһандық дағдарыстарға жауап – бірлік пен тұрақтылықты сақтай отырып, еңбек ету болмақ.

«Нұр Отан» партиясының кезектен тыс XVII съезіне қатысып келген аталмыш кәсіпорынның бас директорының орынбасары Андрей Могилин Елбасы Н.Назарбаевтың шешімі ел мүддесіне сай елеп-ек­шелген саяси ұйғарым екенін жеткізді.

«Елбасы Нұрсұлтан Әбішұлының 5-ші шақырылымдағы Парламент Мәжілісін тарату туралы Жарлыққа қол қоюына, ҚР Парламенті Мәжілісі депутаттарының кезектен тыс сайлауын тағайындауға байланысты жариялаған Үндеуінде: «Баршамыздың бір ғана мақсатымыз бар. Ол – халық пен елдің игілігі. Бәріміз Қазақстанның өсіп-өркендеуі жолында еңбек етіп, күш-жігерімізді жұмсаймыз. Біз бірлесе отырып, бүгінгі заман алдымызға тосып отырған барша қиындықтар мен сын-қатерлерді міндетті түрде еңсеретін боламыз» деген болатын. Сіздерді Пар­ламент Мәжілісі депутаттарының кезек­тен тыс сайлау өткізу туралы бастамасын қолдауға, егемен еліміздің ертеңгі болашағына жауапкершілікпен қарауға шақырамын»,-деді Андрей Васильевич.

Жиын барысында сөз алған кәсіпорынның еңбек ардагерлері уақыт талабынан туындаған шешімді қолдайтындықтарын жеткізді.

– Халықаралық қатынас шиеленіскен тұста және әлемдік дағдарыс белең алған қазіргідей шақта Қазақстан Республика­сы Парламенті Мәжілісінің және барлық деңгейдегі мәслихат депутаттарының сай­лауын өткізу өте орынды деп санаймын. Біз халық мүддесіне сай келетін шешімді бірауыздан қолдап, қуаттаймыз,-деді Юрий Тетушкин.

Сайлау өткізу туралы оңтайлы шешім бюджеттік үнемділікті қамтамасыз ететіндігін жеткізген Анатолий Иванов ұжымды саяси науқанда белсенділік та­нытып, кемел келешек үшін дауыс беруге шақырды.

Анар ШАМШАДИНОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.