Бүлдіршіндер жүрегіне нұр шашып...

Қазақстан Республикасы Тәуелсіздігінің 25 жылдығына орай тұрмыс жағдайы төмен, көп балалы отбасылар, мүмкіндігі шектеулі балаларға көмек көрсету мақсатында «Шапағат нұры» қайырымдылық акциясы өтті.

2013 жылдың қараша айында Маңғыстау облысының 40 жылдығы және ұлттық валюта – теңгеміздің 20 жылдығына орай бастау алған «Шапағат нұры» қайырымдылық акциясы биыл да жалғасын тауып, мейірімділік туын көтерді.

Қайырымдылық шараны ашқан облыс әкімінің орынбасары Шолпан Ильмұханбетова әкімшіліктің елдің ертеңгі тізгінін ұстайтын балақайларға әрдайым қол ұшын беруге дайын екенін айтты. Және алдағы уақытта әлеуметтік жағдайы төмен отбасыларға осы тектес акциялар ұйымдастырылып тұратынын жеткізді.

Акцияға қатысқан облыстық қаржы ұйымдары мен екінші деңгейлі банктердің қызметкерлері бір күндік жалақысын «Үмір сәулесі» әлеуметтік көмек қорының арнайы шотына аударып, нәтижесінде 3 млн-нан астам қаражат жинады.

30-дан астам ауыр сырқатты балалар мен мүжәлсіз отбасылардың бүлдіршіндеріне арнайы ақшалай сертификаттар, түрлі-түсті шарлар және тәтті сыйлықтар табысталды. Онымен қоса 10 баланың еміне қаржылай жәрдем көрсетіледі. Бұл кішкене қамқорлыққа риза болған ата-аналар ұйымдастырушылар мен облыс әкімінің басшыларына алғыстарын жаудырды.

— Мен 9 бала тәрбиелеп отырған ақ жаулықты анамын. Тұңғышым 30-да болса, кенжемнің жасы 6-да. Бүгін 3-сыныпта оқитын Жасұлан деген ұлымды әкеліп отырмын. Жағдайымызды ескеріп, біз сияқты көпбалалы отбасыларды назарынан тыс қалдырмай, көмек көрсетіп жатқаны қуантады. Барлық ұйымдастырушыларға алғысымды білдіремін. Балалар – елдің болашағы. Сондықтан оларға көмек беру арқылы біз елімізді өркендетеміз, өсіреміз, — деді алтын құрсақты ана Айман Өсерова.

Осы уақытқа дейін «Шапағат нұры» акциясы аясында 200-ден астам мүгедек бала мен аз қамтылған отбасыға, Түпқараған ауданында газ құбыры жарылғысынан жапа шеккен отбасыға және науқас баланың Беларусь Республикасының онкологиялық орталығында ем алуына жалпы 7 млн.-нан астам теңге сомасында қайырымдылық көмек көрсетілді. Акция желтоқсан айында да жалғасады.

Ханым ҚУАТ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.