ҚазГӨЗ-дегі өрт: Сұйытылған газбен қамтамасыз ету тоқтамайды

Өрт салдарынан градирня конструкциясының бір бөлігі істен шықты, негізгі жабдық (компрессорлық жабдық) зақымданбады. Градирняны қалпына келтіру бойынша авариялық-жөндеу жұмыстары басталды, деп хабарлайды mangystaumedia.kz.

ҚазГӨЗ бойынша оқыс оқиғаны тексеру туралы бұйрық шығарылып, өрт салдарын жою бойынша жедел штаб құрылған. Зауыттың дайын өнім қоймаларындағы сұйытылған мұнай газының мөлшері өңірдің қажеттілігін шамамен екі тәулікке (шамамен 1,2 мың тонна) қамтамасыз етеді.

Сондай-ақ, Маңғыстау облысы әкімдігінің жедел ақпараты бойынша өңірде сақтау базаларында сұйытылған газдың тағы үш тәулікке жететін қалдығы бар (шамамен 1,5 мың тонна). Бұдан басқа, қажеттілік туындаған жағдайда Атырау мұнай өңдеу зауытынан өңірге сұйытылған газды баламалы жеткізуді жүргізуге мүмкіндік бар.

Ай сайын Маңғыстау облысына шамамен 18 мың тонна сұйытылған газ бөлінеді, оның ішінде ҚазГӨЗ-ден 14,5 мың тонна және АМӨЗ-ден 3,5 мың тонна. Бүгінгі күні жедел ақпарат бойынша ҚазГӨЗ-ден 8 мың тоннадан және АМӨЗ-ден 1,6 мың тонна астам сұйытылған газ жөнелтілді. Зауыт жұмысы жақын арада толық қалпына келтірілетін болады, делінген ЭМ таратқан ақпаратта.

Өңірде сұйытылған газбен қамтамасыз ету бойынша ешқандай тоқтау болмайды.

Айта кетейік, кеше Жаңаөзен қаласындағы Қазақ Газ Өңдеу Зауытының компрессорлық қоймасы түнгі сағат 22.16-де өртенген еді. МО ТЖД мәліметі бойынша қойманың 980 шаршы метр аумағы жанған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.