Қызылсай ауылының тұрғыны құсбегілікпен айналысады

Жаңаөзен қаласына қарасты Қызылсай ауылының тұрғыны Жеңісхан Бақболатұлы қазақ халқының ежелден келе жатқан көне дәстүрінің бірі құсбегілікпен айналысады, деп хабарлайды mangystaumedia.kz.

Жаңаөзен қаласы әкімдігі таратқан ақпаратта, бүркітші Жеңісханның әкесі де аңшылықпен айналысып, қақпан құрып, тазы жүгірткен.

«Сонау бағзы заманнан келе жатқан құсбегілік өнерді, дәріптеп жүргенімізге де бірнеше уақыт болды. Кең дархан далада қандауыз қақпан құрып, бүркіт ұшырып, алған аңның терісін илеймін. Бала кезімде әкем қасқыр, түлкі секілді аңды аулап, терісін илеп, үйретіп отыратын. Қазақ халқының тектілігін, жігіттерінің серілігі мен жүректілігін танытатын бұл өнер аса білгірлік пен мықтылықты талап етеді. Жыртқыш құспен тіл табысып, оны айтқанына үйрету үшін де төзімділік пен қайсарлық қажет. Жаратылысынан жабайы, жыртқыш болып жаралған қыранқұсты шошытып, үркітіп алмай байланысу да аса маңызға ие», дейді Жеңісхан Бақболатұлы.

Ол алдағы уақытта құсбегілік өнерді жастарға үйретуді мақсат етіп отыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.