Облыста жыл басынан бері қалта ұрлығына қатысты 13 қылмыс ашылды

Жыл басынан бері Маңғыстау облысы Полиция департаментінің Криминалдық полиция басқармасы қалта ұрлығына қатысты 13 қылмысты ашты.

Полиция қызметкерлері көшелерде және қоғамдық орындарда ұрлықтың алдын алу бойынша профилактикалық түсіндіру іс-шараларын жүргізеді, буклеттер таратады және оларды адамдар көп жиналатын орындарға іледі.

Жаңаөзен қаласының кезекші бөліміне 21 жастағы жергілікті тұрғын қалта ұрлығы туралы арызданған. Азаматша полицейлерге көшеде белгісіз біреу әмиянын сөмкесінен ұрлап, оқиға орнынан қашып кеткенін айтты.

Аталған факті бойынша қылмыс белгілеріне байланысты қылмыстық іс қозғалды. Жедел-іздестіру іс-шараларын жүргізу нәтижесінде қылмыстық іздестіру бөлімінің жедел уәкілдері күдіктіні анықтады. Ол полиция есебінде тұрған Атырау қаласының 29 жастағы жұмыс істемейтін тұрғыны болып шықты.

Тергеу барысында ұсталған адамның тағы бір ұрлыққа қатысы бар екені анықталды. Жаңаөзен тұрғыны полицияға ұрлық туралы арызданған. Белгілі болғандай, қаскүнем терезені күштеп ашып, пәтерге кіреді. Сөйтіп шкафта сақталған 16 алтын әшекейді ұрлап кеткен. Жәбірленушіге келтірілген шығын – 2 миллион теңге. Жауап алу кезінде ол қылмысын мойындады. Тергеу іс-әрекеттерін жүргізу барысында ұрланған заттар күдіктіден тәркіленіп, қылмыстық іс материалдарына заттай айғақ ретінде қосылды. Материал сотқа жіберілді.

– Өз мүлкіңізге мұқият болыңыз! Қалта ұрлығы сияқты қылмыстың құрбаны болмас үшін, заттарды сенімді жерлерде, ішкі қалталарда немесе түймесі бар қалтада сақтаған жөн. Ешбір жағдайда құнды заттарды жеңіл қолжетімді киім қалтасына, рюкзактың қалтасына, сондай-ақ сөмкенің бүйір қалтасына салуға болмайды, – деп ескертеді полиция департаментінің бастығы Жанарбек Бақтыбаев.

Polisia.kz

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.