Қандай кәсіпкерлік нысандары ашылады?
Карантин режимін ескере отырып, Экономикалық өсімді қалпына келтіру жөніндегі мемлекеттік комиссия отырысының қорытындысына сәйкес және әкімдіктер мен Денсаулық сақтау министрлігінің ұсыныстарына байланысты Маңғыстау облысында 18 мамырдан бастап жұмыстарын жандандыратын келесідей кәсіпкерлік нысандарының тізімі жасақталды:
1. Жалпы қалалар мен аудан ішіндегі барлық қозғалыс таңғы сағат 6:00-ден кешкі сағат 21:00-ге дейін жүзеге асырылуы тиіс.
2. Парктер мен скверлер және теңіз жағалауында тұрғындарға қыдыруға рұқсат беріледі. Алайда, оларда орналасқан ойын алаңдары мен нысандардың жұмыс істеуіне рұқсат жоқ.
3. Қала және ауыл ішілік қоғамдық көліктер өз жұмыстарын бастайды. Қоғамдық көліктер жолаушыларды отырғызу орындарының саны бойынша тасымалдау қажет және жолаушылар мен қызмет көрсетушілер жеке қорғану құралдарын міндетті түрде алып жүруі тиіс. Әр рейстен кейін көлікті дезинфекциялау құралдарымен өңдеу керек.
4. 30 адамдық орынға дейінгі жазғы кафелер мен жеке кабинкалар (би алаңдарынсыз) эпидемияға қарсы шараларды қатаң сақтай отырып сағат 10:00 – 18:00 аралағында өз жұмыстарын бастайды.
5. Азық-түлік емес базарлар эпидемияға қарсы шараларды қатаң сақтай отырып сағат 10:00 – 17:00 аралағында жұмыс істейтін болады.
6. Монша кешендері, моншалар, сауналар, СПА сағат 09:00 – 21:00 аралағында тек қана жеке нөмірлер мен кабинкаларда жұмыс істеуіне рұқсат беріледі.
7. Ашық спорт алаңдарында, стадиондарда жаттығу жасауға рұқсат беріледі.
8. Қонақ үйлердің жұмыстарына рұқсат беріледі. Тамақтану, яғни таңғы ас, түскі ас және кешкі ас тек қана бөлмеге алдыру арқылы жүзеге асуы тиіс.
Барлық қозғалысқа таңғы 6:00-ден кешкі 21:00 дейін рұқсат
Қалалар мен аудандардағы барлық қозғалысқа таңғы сағат 6:00-ден кешкі сағат 21:00-ге дейін рұқсат беріледі, оған арнайы рұқсат қағаздарын алудың қажеті жоқ.
Ал, қалалар мен аудандардың аралығындағы блокпосттар әдеттегіше жұмыс істей береді. Яғни аудан аралық қозғалысқа әлі де шектеу бар.
Бұл өзгерістердің барлығы Маңғыстау ауданының Шайыр ауылына, Қарақия ауданының Сенек, Құланды, Бостан ауылдарына және Бейнеу ауданының Бейнеу, Боранқұл ауылдарына қатысы жоқ.
Әуе рейстерінің жолаушыларына нұсқаулық
Сонымен бірге, Ақтау әуежайының 16 мамырдан бастап ішкі әуе рейстерін қабылдай бастағаны баршаңызға мәлім. Осы орайда, жолаушылар мен күтіп алушылар ескеруі тиіс мәселелерді ұсынамыз:
-Жолаушы электронды билетті немесе оның қағаз нұсқасын өзімен алып жүруі тиіс;
-Күтіп алушы мен шығарып салушылар әуежайдың жолаушылар терминалына кіргізілмейді;
- Бетпердесі болуы тиіс;
-Блок-бекеттерде билеттің өзін немесе көшірмесін көрсету қажет.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
