Жаңаөзенде мүмкіндігі шектеулі спортшыларға арналған кешен ашылды

Бүгін, 24 сәуір күні Жаңаөзенде мүмкіндігі шектеулі жандарға арналған «Алға» спорт клубының кешені салтанатты түрде ашылды, деп хабарлайды mangystaumedia.kz тілшісі.

Кешеннің ашылу салтанатына аймақ басшысы Нұрлан Ноғаев пен «ҚМГ» басқарма төрағасы Мағзұм Мырзағалиев, Жаңаөзен қаласының әкімі Жансейіт Қайнарбаев, «Өзенмұнайгаз» АҚ бас директоры Нұрдәулет Килыбай қатысты.

Барлық керекті жарақпен қамтылған кешен «ҚазМұнайГаз» ҰК АҚ еншілес кәсіпорны «Өзенмұнайгаз» АҚ қаражатына салынған.

Кешенде мүмкіндігі шектеулі және тірек-қимыл аппараты зақымдалған жандарға арналған заманауи тренажерлармен жабдықталған, лифтілер мен пандустар орнатылған. Бұл – компанияның демеушілігімен салынған және пайдалануға берілген қаладағы екінші спорт кешені.

«Біз осындай керемет спортшыларға қолдау көрсетіп, олардың спорттағы жетістіктеріне үлес қосқанымызды мақтан тұтамыз. Біз жеңістің қуанышын сезінетін және басқаларды өзінің үлгісі мен табандылығымен шабыттандыратын мүмкіндік жасауға қуаныштымыз. Сайып келгенде, спорт – бұл өзіңді физикалық тұрғыда жеңу ғана емес, мықты рух пен ерік-жігердің көрсеткіші», - деп атап өтті Мағзұм Мырзағалиев.

«Алға» спорт клубында бүгінде 100-ге жуық спортшы шұғылданады. Олардың қатарында республикалық және халықаралық жарыстардың бірнеше дүркін чемпиондары бар. Сонымен қатар, клуб спортшылары 2024 жылы Парижде (Франция) өтетін Паралимпиада ойындарына жолдама алды.

- Алланың сынағаны аздай, адамның сынағаны өте қиын. Алдымызға мақсат қойып, үлкен қиындықтан өттік деп айта аламын. Мұндай кешенде аяқ-қолдың жоқтығы білінбейді екен. Алдағы уақытта осындай кешенде дайындала жүріп, қазіргіден де жақсы жетістікке жетеміз деп ойлаймын. Шыны керек бұл қаламыздағы мүгедектерге лайықтап жасалған ең алғашқы кешен, - деді «Алға» клубының жетекшісі Құралбек Сейітов.

Спорт клубта отырып ойнайтын волейбол, бочча, тоғызқұмалақ, қол күресі, футбол, жеңіл атлетика, теннис, жүзу және өзге де 17 үйірме бар.

Сонымен қатар, ҚМГ «Таза Қазақстан» жалпыұлттық экологиялық акциясын қолдау мақсатында кешен ауласында ағаш отырғызды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.